Sam­mála Snorra: „Alltaf á hreinu að við vorum á sömu blað­síðunni“

Eftir heimsmeistaramótið í janúar sagði Snorri að Haukur þyrfti að komast í sterkari deild til að taka næsta skref á ferlinum. 

„Ég held að hann viti það manna best sjálfur að hann þarf að spila í topp þrír deild í heiminum og spila þar reglu­lega, helst vörn og sókn, ef hann ætlar að taka næsta skref,“ sagði Snorri í samtali við Vísi.

Haukur svaraði kallinu og gekk í raðir Rhein-Neckar Löwen í Þýskalandi frá Dinamo Búkarest sem er yfirburðalið í Rúmeníu í sumar. Hann hefur látið að sér kveða með nýja liðinu og hefur gefið flestar stoðsendingar allra í þýsku úrvalsdeildinni.

Haukur segist hafa verið í sambandi við Snorra þótt landsliðsþjálfarinn hafi ekki haft úrslitaáhrif á hver áfangastaður Selfyssingsins varð. En þeir hafi verið á sömu bylgjulengd hvað næsta skref á ferli Hauks varðaði.

„Auðvitað hef ég rætt það við hann innan landsliðsins og það var alltaf á hreinu að við værum á sömu blaðsíðunni með það. Eins og ég hef rætt áður held ég að við höfum verið sammála um ákveðna hluti, hvað væri gott fyrir mig að gera og mikilvægt fyrir mig. En það var alls engin pressa,“ sagði Haukur.

Það styttist í janúar og þar með í næsta stórmót hjá íslenska karlalandsliðinu. Haukur segir að leikmenn þess vilji gera sig gildandi á EM 2026 og taka næsta skref. Síðan á EM 2014 hefur Ísland aðeins einu sinni verið á meðal sex efstu liða á stórmóti.

„Við höfum verið stutt frá því og átt eftir að taka þetta næsta skref sem er kannski erfiðasti hjallinn. Ég held að allir séu sammála um að gera betur og ná betri árangri en við höfum náð á síðustu mótum,“ sagði Haukur. Að hans mati er innistæða fyrir bjartsýni á gott gengi á EM.

„Við teljum okkur vera með gott lið og allt til að gera góða hluti. Það að taka þetta næsta skref er það sem við eigum eftir. Það er auðvelt að segja það en við höfum allir trú á því,“ sagði Selfyssingurinn að lokum.

Evrópumótið 2026 fer fram í Danmörku, Noregi og Svíþjóð. Ísland er í F-riðli mótsins ásamt Ungverjalandi, Póllandi og Ítalíu. Riðillinn verður leikinn í Kristianstad í Svíþjóð.