Golf

Grænt ljós á golf­mótið þrátt fyrir gos

Siggeir Ævarsson skrifar
Húsatóftavöllur í Grindavík. Í fjarska ofarlega hægra megin á myndinni má sjá eina af hraunbreiðunum sem runnu í kringum bæinn
Húsatóftavöllur í Grindavík. Í fjarska ofarlega hægra megin á myndinni má sjá eina af hraunbreiðunum sem runnu í kringum bæinn Facebook Golfklúbbur Grindavíkur

Grindvískir kylfingar eru að sögn orðnir öllu vanir þegar kemur að glímunni við náttúruöflin. Þeir urðu að vísu að játa sig sigraða í dag og fresta fyrirhuguðu meistaramóti en ætla ekki að láta deigan síga og hefja leik á morgun.

Eldgos hófst í nótt við Litla-Skógfell, töluvert langt norður af Grindavík og enn lengra frá golfvellinum á Húsatóftum, sem er suðvestan megin við bæinn. Bærinn var engu að síður rýmdur í varúðarskyni og því ekkert annað í stöðunni en að fresta byrjun meistaramóts Golfklúbbs Grindavíkur en mótið er það fjölmennasta í sögu klúbbsins.

Íþróttadeild Vísis ræddi við Helga Dan Steinsson, framkvæmdastjóri GG í morgun sem var bjartsýnn þrátt fyrir allt:

„Þetta setur smá strik í reikninginn hjá okkur, en þó ekki meira en það að við spilum þrjá daga í staðinn fyrir fjóra. Það er ef við fáum leyfi til þess að fara inn seinni partinn í dag eða á morgun. Þetta er ekki stærra mál en það.“

Nú er orðið ljóst að Grindvíkingar munu hefja leik í fyrramálið og halda ótrauðir sínu striki. Töluverð loftmengun hefur verið á Reykjanesi í dag af völdum gossins en vindáttin er hagstæð fyrir Grindvíkinga og feykir hún allri mengun frá Grindavík og yfir nágranna þeirra í Reykjanesbæ.

Grindavík Eldgos og jarðhræringar Eldgos á Reykjanesskaga Golf

Mest lesið


Fleiri fréttir

Sjá meira


×

Mest lesið