Musk hraunar yfir „stórt og fal­legt“ frum­varp Trumps

Umrætt frumvarp var samþykkt með naumindum í fulltrúadeild Bandaríkjaþings í síðasta mánuði og er til umræðu í öldungadeildinni. Musk er verulega andvígur fjárútlátum í frumvarpinu og segir að það muni sökkva bandarísku þjóðinni í skuldafen.

Í færslu sem hann skrifaði á X, samfélagsmiðil sinn, í gær sagði Musk að þingmenn sem studdu frumvarpið sé meðvitaðir um að þeir hafi gert rangt. Í annarri færslu sagði Musk svo að allir stjórnmálamenn sem hefðu svikið bandarísku þjóðina yrðu reknir í nóvember.

Hann hélt svo áfram í morgun og sagði meðal annars að eyðsla yfirvalda í Bandaríkjunum myndi á endanum hneppa þjóðina í ánauð. Fúlgur fjár færu í að greiða vexti af skuldum ríkisins og á endanum yrðu ekki til peningar fyrir neitt annað.

Þingkosningar verða haldnar í nóvember en Musk varði í fyrra í það minnsta 250 milljónum dala í að styðja Donald Trump í kosningabaráttunni um Hvíta húsið. Þá hefur hann heitið því að nota peninga sína gegn öllum þeim þingmönnum sem þykja ekki nægilega hliðhollir Trump.

Nú er hann hinsvegar að hóta því að beita sér gegn þingmönnum sem greiða atkvæði með frumvarpi sem Trump hefur krafist þess að Repúblikanar samþykki. Hversu alvara Musk er þykir þó ekki ljóst. Hann lýsti því til að mynda yfir í síðasta mánuði að hann ætlaði að verja mun minna til stjórnmála í framtíðinni. Í bili allavega.

Sjá einnig: Ætlar að eyða mun minna í pólitíkina

Þá steig Musk til hliðar frá störfum sínum fyrir Trump á dögunum og hélt forsetinn við það tilefni athöfn í Hvíta húsinu.

Eins og bent er á í frétt AP fréttaveitunnar myndi frumvarpið meðal annars fella niður ívilnanir sem hagnast Tesla, rafmagnsbílafyrirtæki Musks. Hann er þó verulega andvígur auknum fjárútlátum bandaríska ríkisins og hefur barist fyrir niðurskurði í störfum sínum fyrir Trump í gegnum Doge-niðurskurðarstofnunina.

Hin hlutlausa stofnun Congressional Budget Office er nokkurs konar ríkisendurskoðun Bandaríkjanna. Stofnunin fer yfir lagafrumvörp og metur áhrif þeirra og mögulegan kostnað. Sérfræðingar hennar áætla að frumvarpið muni auka skuldir ríkisins um 2,4 billjónir dala á næstu tíu árum.

Það samsvarar um 305 billjónum króna.

Því segjast margir Repúblikanar ósammála og segja að frumvarpið muni borga sig með auknum hagvexti.

Repúblikanar eru þó ekki sammála um kosti frumvarpsins og þykir líklegt að það muni taka miklum breytingum í öldungadeildinni, áður en það fer aftur fyrir fulltrúadeildina.

Trump stendur við frumvarpið

Karoline Leavitt, talskona Trumps, sagði við blaðamenn í gærkvöldi að forsetinn væri meðvitaður um afstöðu Musks gagnvart frumvarpinu. Það breytti ekki afstöðu Trumps, sem styddi það enn.

„Þetta er eitt stór, fallegt frumvarp og hann stendur við það.“

Mike Johnson, forseti fulltrúadeildarinnar, sagði einnig að Musk hefði rangt fyrir sér um frumvarpið. Hann sagðist hafa rætt frumvarpið við auðjöfurinn í um tuttugu mínútur og sagði Musk hafa rangt fyrir sér.

„Þetta er ekki persónulegt. Ég veit að honum þykja rafmagnsbílaívilnanirnar mikilvægar. Þær eru að fara því ríkisstjórnin á ekki að niðurgreiða þessa hluti,“ sagði Johnson.

„Ég veit hvaða áhrif það hefur á fyrirtæki hans og mér þykir það miður. En að hann stígi fram og hrauni yfir allt frumvarpið eru, að mér finnst, vonbrigði og óvænt, í ljósi samtals okkar í gær.“