Á­kærður fyrir að ráðast á leigu­bíl­stjóra

Mannlíf greindi fyrst frá ákærunni á hendur Bassa sem loks er komin til meðferðar dómstóla en á þriðja ár er liðið frá atburðum. Samkvæmt heimildum fréttastofu sótti leigubílstjórinn Bassa og tvo til viðbótar um fimmleytið um nóttina í miðbæ Reykjavíkur.

Að sögn leigubílstjórans fór einn farþegi úr við Skeifuna án þess að borga og þaðan var haldið í Bryggjuhverfið. Þá yfirgaf annar farþeginn bílinn. Bílstjórinn segist þá hafa krafið Bassa um greiðslu upp á 14 þúsund krónur fyrir farið.

Að sögn bílstjórans yfirgaf Bassi þá bílinn án þess að borga en Bassi heldur því fram að hann hafi ætlað að ná í vin sinn til að borga. Bílstjórinn fór þá úr bílnum, tók símann af Bassa sem brást illa við.

Upptaka úr leigubílnum meðal sönnunargagna

Samkvæmt ákærunni er honum gefið að sök að hafa bitið í hnakka og öxl bílstjórans, kýlt hann í ennið, tekið kverkataki og vafið snúr um háls leigubílstjórans. Annar leigubílstjóri og kona nokkur komu að átökunum sem vöktu einhverja íbúa af værum blundi því leigubílstjórinn þrýsti á bílflautuna til að vekja athygli á árásinni.

Þetta var í febrúar 2023 en það var svo í janúar síðastliðnum sem leigubílstjórinn mætti á lögreglustöðina á Vínlandsleið í Grafarvogi og lagði fram formlega kæru. Kærunni fylgdi áverkavottorð en auk þess er upptaka úr leigubílnum umrædda nótt meðal sönnunargagna í málinu.

Amfetamín í poka

Þegar Bassi var handtekinn umrædda nótt fundust 0,08 grömm af amfetamíni á honum í poka í buxum hans. Bassi sagði við skýrslutöku ekki kannast við efnin og afsalaði sér þeim til eyðingar. 

Fram kom við skýrslutöku yfir Bassa viku síðar að honum þætti leitt hvernig málin hefðu þróast og bauðst til að greiða leigubílinn.

Bassi er ákærður fyrir brot á 217. grein almennra hegningarlaga en refsing við brotinu getur að hámarki verið eins árs fangelsi. 

Bassi baðst undan að tjá sig um efni ákærunnar við fréttastofu þegar eftir því var leitað.

Fréttin hefur verið uppfærð.