Hand­tekinn í fyrra en vann nú með tárin í augunum

Þetta var þriðja risamótið sem Scheffler vinnur en hann hafði áður unnið Masters árin 2022 og 2024.

Scheffler var með forystuna fyrir lokadaginn en náði ekki að njóta sín fyrri níu holurnar og var þá um tíma orðinn jafn Spánverjanum Jon Rahm á samtals -9 höggum. Spilamennska Rahm hrundi hins vegar gjörsamlega og endaði hann á -4 höggum á meðan að Scheffler vann á -11 höggum.

Næstir á eftir honum urðu Bryson DeChambeau, Harris English og Davis Riley á -6 höggum hver. Jhonattan Vegas, sem var efstur eftir fyrstu tvo hringina, endaði á -5 höggum.

Scheffler var handtekinn á miðju PGA-meistaramótinu í fyrra en hann var sakaður um að aka bílnum sínum inn á lokað svæði eftir að banaslys varð í nágrenni Valhalla klúbbhússins, þar sem mótið fór fram. Langar bílaraðir höfðu myndast og ætlaði Scheffler að komast framhjá þeim en var stöðvaður.

Málið vakti gríðarlega athygli enda Scheffler þarna að mæta til leiks til að byrja sinn annan hring á mótinu. Hann var leystur út gegn tryggingargjaldi og kláraði hringinn og svo mótið. Málið gegn honum var síðar fellt niður.

Þessi aðdragandi gæti hafa haft áhrif á það hvernig tilfinningarnar helltust yfir Scheffler í gær en hann lék lokaholuna tárvotur og fagnaði kröftuglega eftir lokapúttið sitt á mótinu.

„Ég vissi að þessi dagur yrði krefjandi. Það er alltaf erfitt að klára risamót og ég gerði vel í að halda þolinmæði fyrri níu holurnar. Ég átti ekki minn besta leik en ég hélt mér inni í þessu og átti góðar seinni níu,“ sagði Scheffler sem naut sigursins með konu sinni og syni á Quail Hollow vellinum í gær.

Scheffler bauð Rahm inn í baráttuna um sigurinn með því að leika fyrri níu holurnar í gær á +2 höggum en hann nældi svo í fugl á 10., 14. og 15. holu og endaði á að vinna öruggan sigur.

Rahm, sem var í ráshópi tveimur holum á undan Scheffler, fékk hins vegar skolla á 16. holu og svo tvöfaldan skolla bæði á 17. og 18. holu, og endaði því í 8.-16. sæti.