Slær bjartari tón þegar kemur að verð­bólgunni

Þetta kemur fram í áliti sem Alþjóðagjaldeyrissjóðurinn birti í morgun og vann eftir viðræður við íslensk stjórnvöld og aðra hagaðila síðustu tvær vikur. Um er að ræða árlega úttekt sjóðsins.

Sjóðurinn gerir ráð fyrir að hagvöxtur á Íslandi taki við sér í ár eftir að töluvert hægði á efnahagslífinu í fyrra og eru horfur taldar góðar til meðallangstíma. Þá er búist við að verðbólgumarkmið Seðlabankans, sem er 2,5 prósent, náist á seinni helming næsta árs.

Hins vegar gæti aukin spenna í milliríkjaviðskiptum orðið meiri en nú er gert ráð fyrir ef bandarískir tollar verða lagðir á innflutt lyf eða ef hugsanlegir refsitollar Evrópusambandsins bitna á Íslandi. Fækkun ferðamanna til og frá Bandaríkjunum gæti einnig haft neikvæð áhrif á ferðaþjónustu.

Óvissa um áhrif aukinnar spennu

Jón Bjarki Bentsson, aðalhagfræðingur Íslandsbanka, segir óvissu um hvaða áhrif aukin spenna í milliríkjaviðskiptum hafi á Ísland.

„Stóra myndin er auðvitað sú að sjóðurinn er nokkuð jákvæður á stöðu og horfur hér á Íslandi sem að tónar ágætlega við það sem við höfum verið að teikna upp hvað koma skal. Þau benda auðvitað réttilega á að það sé veruleg óvissa fyrir okkar litla útflutningsdrifna hagkerfi um hvaða áhrif tollastefna Bandaríkjanna muni hafa. En aftur, ég get líka tekið undir það hjá þeim að þau áhrif verði ekki eitthvað stórkostlega skaðleg,“ segir Jón Bjarki.

Lítil lækkun eða óbreyttir vextir

Jón Bjarki segir nokkra óvissu þegar kemur að verðbólgunni. „Þá er sjóðurinn frekar bjartsýnn á verðbólguna og slær þar bjartari tón heldur en við höfum verið að sjá endurspeglast á mörkuðum og í nýlegum væntingakönnunum. Það væri auðvitað frábært ef þeirra skoðun yrði ofan á en það er óvissa þar sem er því miður á þá leið að verðbólga verði þrálátari,“ segir Jón Bjarki.

Hann segir tvísýnt hvort stýrivextir verði lækkaðir frekar á næstunni.

„Í ljósi þess hversu verðbólguvæntingar eru þrálátt háar – og er eitthvað sem Seðlabankinn vildi klárlega ekki sjá á þessum tímapunkti – það flækir svolítið ákvörðununartökuna hjá þeim og reyndar einnig það, sem er kannski styrkleikamerki, hversu mikill töggur er ennþá í hagkerfinu. Þannig að ef vextir lækka nú eftir hálfan mánuð þá verður það smátt skerf og það er ekki útilokað að vöxtum verði haldið óbreyttum,“ segir Jón Bjarki.