„Ég er smá í móðu“

„Ég er ótrúlega stolt af liðinu eftir þennan leik. Ég er smá í móðu núna beint eftir þetta, þetta var hnífjafnt í lokin en við sýndum góða liðsheild að klára þetta,“ segir Elín Klara eftir leik.

Elín Klara fiskaði víti fyrir Hauka á mikilvægum tímapunkti. Liðið var einu marki yfir þegar 40 sekúndur voru eftir, hún brunaði í gegn, fékk vítið og steinlá. Einhver velti fyrir sér hvort hún hefði heilsu til að taka vítið eftir byltuna.

„Kannski. Ég fékk aðeins í bakið, en við þurftum að klára þetta. Maður er einhvern veginn alltaf í jörðinni og það bara fylgir þessu. Ég er kannski orðin svolítið vön því. Ég var með í hausnum í hálfleik en það fór bara. Ég náði að gleyma mér,“ segir Elín Klara sem fékk nokkrar vænar byltur í leiknum.

Markið af vítalínunni var það 25. í leiknum og kom Haukum tveimur yfir. Fram skoraði sárabótarmark í lokin en eins marks sigur staðreynd og Haukar komnir í 2-0 eftir að hafa unnið óvenjustóran tólf marka sigur í fyrsta leik.

„Maður þarf að hafa fyrir þessu, við bjuggumst ekki við þessu í fyrsta leik og vissum að þessi yrði mun erfiðari. En við gíruðum okkur upp í það,“ segir Elín. Haukar þurfa aðeins einn sigur til að klára einvígið en Fram með bakið upp við vegg.

„Það verður ennþá erfiðari leikur. Þær vilja væntanlega ekki fara í sumarfrí. Þetta verður mjög erfitt fyrir okkur og kúnst að mæta í næsta leik. En ég vil sjá aftur fulla höll, það var geggjuð stemning hérna,“ segir Elín Klara.