Kalli Bjarni búinn að breyta lífi sínu

Þetta er meðal þess sem fram kom í Brennslunni á FM957 í morgun. Þangað mætti Kalli Bjarni í nýjan lið í Brennslunni sem heitir Hvar ertu nú? Um er að ræða spjall við einstaklinga sem voru mikið í sviðsljósinu og þjóðfélagsumræðunni á ákveðnum tíma en hafa að undanförnu verið undir radarnum.

Fannst fáránlega fyndið að skrá hann til leiks

Kalli Bjarni kom, sá og sigraði Idol Stjörnuleit árið 2004 og skaust þá upp á stjörnuhimininn. Hann hefur áður opnað sig um þennan tíma og lýst því hvernig álagið hafi orðið honum um megn en Kalli Bjarni villtist um tíma af braut og komst í kast við lögin. Hann ræðir málin á einlægan hátt við þá Egil og Rikka G í Brennslunni.

„Þarna er ég 27 ára, þegar ég skrái mig. Það fyndnasta við þetta var, að eina nasasjónin sem ég hafði haft af þessu, var að við vorum með kapalsjónvarp í frystitogaranum sem ég var á og þar var þetta bara nýlega byrjað, þar vorum við að horfa á American Idol,“ rifjar Kalli Bjarni upp.

„Svo fórum við að fíflast með þetta, því ég hafði eitthvað verið að laumast til að syngja og söng á einhverju sjómannadagsballi með áhöfninni og þeim fannst rosalega fyndið að skrá mig í keppnina. Svo fékk ég bara símtalið: Heyrðu þú þarft að mæta hérna upp á Hótel Loftleiðir og ég bara: Ha?! Og þá fattaði ég þetta og þá hugsaði ég: Djöfull skal ég taka djókið lengra!“

Kalli Bjarni segist telja að þetta hafi hjálpað honum í keppninni, hann hafi einfaldlega fokkað í félögum sínum til baka og unnið keppnina. „Ég man að ég hringdi í skipstjórann og sagði honum bara: Heyrðu, ég komst óvart áfram! Ha, komstu áfram?!? Kemurðu þá ekki í næsta túr? Nei, ég verð að fá frí aftur og svona bara gekk þetta.“

Kalli Bjarni mætti í Idol árið 2022 og rifjaði upp gamla takta. 

Áttaði sig seint á allri athyglinni

Hann rifjar upp í Brennslunni að þetta hafi verið löngu fyrir tíma samfélagsmiðla og um fyrsta alvöru raunveruleikasjónvarpið að ræða á Íslandi. Kalli Bjarni segist ekkert hafa spáð í athyglinni á meðan keppninni stóð, hann hafi tekið þetta viku fyrir viku og mest hugsað um að gera sitt besta.

„Ekki fyrr en að ég er búinn að vinna keppnina og ég er í Kringlunni. Ég fæ mér pulsu með öllu og mikið remúlaði og svo er ég að fara upp rúllustigann og á leiðinni upp og ég er eiginlega bar einn í stiganum og það eru kannski svona fjórtán, fimmtán manns á leiðinni niður og þau eru öll að hvísla og benda eitthvað. Ég bara: Nú er ég búinn að sulla remúlaði á mig! En þá bara fattaði ég, vá þau bara vita öll hver ég er. Það var rosa sjokk.“

Kalli Bjarni segist hafa og enn vera sjómaður, það sé í blóðinu. Hann hefði ekki viljað breyta neinu, þó líf hans hafi verið allskonar, það sé yndislegt í dag. Talið berst í Brennslunni að tímanum eftir Idol þegar Kalli Bjarni sló í gegn með laginu Aðeins einu sinni. Hann segist ekki geta tekið gigg án þess að grípa í það lag.

Svona var þetta þegar Kalli Bjarni sigraði Idol Stjörnuleit í Vetrargarðinum árið 2004. 

Loksins á góðum stað til að fylgja lögunum eftir

„Ég ákvað fyrir einu ári og einum degi að skilja við öll hugbreytandi efni og áfengi og ég er orðinn eins árs edrú í dag. Það var gamechanger sko. Ég leit alltaf á þetta sem hækjur en sérstaklega eftir að maður er búinn að vera edrú núna, þá fattar maður það að þetta er búið að draga mann niður.“

Hann segist loksins geta gert það sem hann hefur langað að gera allan tímann, að semja sína eigin tónlist. Núna ætli hann að kýla á þetta.

„Ég er búinn að semja mjög mörg lög í gegnum allan blúsinn og er loksins núna kominn með band og ætla að fara að kýla á þetta, ásamt því að ég er búinn að bæta á mig réttindum sem skipstjóri. Það er allt að gerast, líf mitt er búið að taka rosalega góðum stakkaskiptum.“

Kalli Bjarni segist hafa samið ýmis lög í gegnum tíðina. Sem betur fer hafi hann ekkert gefið þau út því hann hafi viljað vera á góðum stað til þess að geta líka fylgt þeim eftir. „Þetta er eins og hluti af börnunum manns, þessi lög sem maður semur.“

Þá berst talið að syni Kalla Bjarna, honum Jón Emil sem einmitt fetaði í fótspor föður síns og tók þátt í Idol árið 2022. Kalli Bjarni segir það hafa verið æðislega stund, sonur hans sé föðurbetrungur í söngnum.

Kalli Bjarni tók sigurlagið eftir að í ljós kom að hann var sigurvegari Idol Stjörnuleitar árið 2004.