„Geð­veikt að sjá þennan bláa vegg“

Ísland var 13-9 yfir eftir fyrri hálfleik og hleypti Egyptum aldrei of nærri sér í seinni hálfleik, og vann að lokum þriggja marka sigur, 27-24. Liðið er því efst í milliriðli IV með sex stig og í góðri stöðu upp á að komast í 8-liða úrslitin.

„Þetta var ekkert sturlaður leikur hjá okkur en samt vorum við með þægilega forystu allan tímann. Ég ætla ekki að segja að þetta hafi verið í „cruise control“, en við gerðum okkar. Auðvitað eru hlutir sem þarf að fínpússa og þeir eru klókir allan tímann. Síðan eru nokkur færi sem fóru forgörðum hjá okkur. Þetta er leikur mistaka og það lið sem gerir færri endar sem sigurvegari. Mér fannst við nokkuð yfirvegaðir í dag, og flottir,“ sagði Gísli.

Viðtalið við hann má sjá hér að neðan.

„Pirrandi að þurfa alltaf að gera eitthvað úr hlutunum“

Gísli gerði hverja árásina á fætur annarri á vörn Egypta en fannst hann ekki alltaf uppskera eins og til var sáð, vegna þýska dómaraparsins:

„Það fer svakalega í taugarnar á mér að þeir leyfi ekki leiknum að fljóta aðeins lengur. Mér fannst svakalega mikið um að þeir fengju að gera aðeins meira, og beðið með flautið, en svo var það öfugt hjá okkur. Það var alveg 2-3 sinnum þar sem það var klárt víti en eins og þeir hefðu tekið fyrir fram ákvörðun um að dæma ekki víti. Það er margt í þessu auðvitað, en maður þarf bara að halda áfram. Ef við gerum okkar hundrað prósent eru okkur allir vegir færir,“ sagði Gísli og hélt áfram:

„Það er pirrandi að þurfa alltaf að gera eitthvað úr hlutunum til að fá eitthvað. En í Guðanna bænum, hvað er í gangi? Ég er jákvæður hérna! Króatar eru næsti leikur, hérna í Zagreb. Ég veit ekki hvað höllin hérna tekur marga en ég er ógeðslega spenntur fyrir andrúmsloftinu sem verður hérna,“ sagði Gísli sem eins og allir Íslendingar bíður nú afar spenntur fyrir leiknum við Króata á föstudagskvöld.

Gæsahúð allan tímann vegna áhorfenda

Þar vonast Hafnfirðingurinn eftir sams konar stuðningi og í kvöld en hann var hæstánægður með íslensku áhorfendurna:

„Gæsahúð, án gríns, allan tímann. Þau mættu með hnefann uppi og að sjá þennan bláa vegg í horninu er alveg geðveikt. Það gefur okkur þessi extra prósent og í svona erfiðum leikjum þá eru það svona hlutir sem skiptir máli. Djöfull er ég sáttur með stuðningsmennina.“