Dætur Jóns og Frið­riks Dórs stálu senunni

Strákarnir voru ekki einir á sviðinu um helgina, en flottur hópur dansara var ómissandi hluti af þessari listrænu heild sem tónleikarnir voru. 

Dætur Jóns og Friðriks Dórs, Mjöll Jónsdóttir 10 ára og Ásthildur Friðriksdóttir 11 ára, voru þar á meðal en báðar æfa þær dans og fimleika af miklu kappi. Þær voru fremstar í flokki í laginu Krumla á þrennum fjölskyldutónleikum sveitarinnar, föstudag og laugardag, og gáfu feðrum sínum ekkert eftir á sviðinu.

„Okkur datt þetta bara í hug að nýta tækifærið þar sem það er ekki endilega oft sem við getum boðið þeim upp á þetta að stökkva upp á svið á svona viðburði og vildum bara leyfa þeim að koma með okkur,“ segir Friðrik Dór í samtali við Vísi. 

„Okkur fannst ótrúlega gaman að fá að deila þessu með þeim.“

Friðrik segir að þetta hafi verið í fyrsta en vonandi ekki síðasta skipti sem dætur þeirra koma fram með þeim bræðrum. „Þær voru þarna fremst á rampinu og frontuðu allt dæmið sem var alveg geggjað. Það var líka gaman að sýna öllum krökkunum að vera með krakka á sviðinu,“ Friðrik.

Spurður hvort þær hafi verið stressaðar áður en þær stigu á svið segir Friðrik að þær hafi verið furðu rólegar. „Þær voru alveg með smá fiðrildi í maganum fyrir fyrsta showið en leystu þetta ótúlega vel,“ segir hann og leynir stoltið sér ekki.

Fagmennska fram í fingurgóma

Friðrik og Jón fara báðir fögrum orðum um Stellu Rósenkranz, leikstjóra, danshöfund og listræns stjórnanda tónleikanna, og segja hana hafa tekið afar vel utan um dætur þeirra. „Hún bæði lét þeim líða vel og trítaði þær eins og krakka, en gaf þeim á sama tíma innsýn inn í alvöru showtime og voru með í eyrunum og eins og við,“ segir Jón.

Friðrik tekur undir orð Jóns og lýsir henni sem mikilli fagmanneskju: „ Hún er þaulvön að vinna með svona ungum dönsurum og var virkilega góð við þær. Á sama tíma kenndi hún þeim á þetta umhverfi af mikilli fagmennsku,“ segir Friðrik.

Stemningin var engri líkt og meðfylgjandi myndir gefa til kynna.