Þessi voru oftast strikuð út í Reykjavík

Vésteinn Örn Pétursson og Bjarki Sigurðsson skrifa 4. desember 2024 17:17

Jakob Frímann Magnússon, Jón Gnarr, Dagur B. Eggertsson og Guðlaugur Þór Þórðarson voru allir með yfir 200 útstrikanir. Dagur var hins vegar í algjörri sérdeild. Vísir

Þó nokkrir frambjóðendur til Alþingis í Reykjavíkurkjördæmunum tveimur voru strikaðir út af lista oftar en hundrað sinnum. Guðlaugur Þór Þórðarson var sá oddviti sem oftast var strikaður út, en Jón Gnarr fékk flestar útstrikanir í Reykjavíkurkjördæmi suður.

Líkt og áður hefur verið greint frá féll Dagur B. Eggertsson, frambjóðandi Samfylkingarinnar og fyrrverandi borgarstjóri, niður um sæti á lista flokksins í Reykjavík norður. Hann var strikaður út 1.453 sinnum, og færðist úr öðru sæti í það þriðja.

Það kemur þó ekki að sök fyrir Dag því maðurinn sem færðist upp fyrir hann á lista, Þórður Snær Júlíusson, hafði áður tilkynnt að hann myndi ekki taka sæti á Alþingi hlyti hann kjör. Dagur situr því fastast í öðru sætinu þrátt fyrir allt.

Fyrrverandi borgarstjórar toppa sín kjördæmi

Dagur var eini frambjóðandinn í Reykjavíkurkjördæmunum tveimur sem hlaut fleiri en þúsund útstrikanir, og nokkuð langt á undan næsta manni. Hann var þar að auki eini frambjóðandinn í Reykjavík sem færðist niður um sæti vegna útstrikana.

Þórður Snær, sem líkt og áður sagði ætlar ekki að taka sæti á þingi, var strikaður út 295 sinnum. Þriðji mest útstrikaði frambjóðandinn kemur einnig úr Reykjavíkurkjördæmi norður, en þó úr öðrum flokki. Það er Jakob Frímann Magnússon, sem var í öðru sæti hjá Miðflokknum, hlaut 262 útstrikanir. Hann komst ekki inn á þing.

Jón Gnarr, frambjóðandi Viðreisnar og fyrrverandi borgarstjóri, var sá frambjóðandi í Reykjavíkurkjördæmi suður sem fékk flestar útstrikanir, eða 225 talsins. Því eru útstrikunartopparnir í Reykjavíkurkjördæmunum báðir fyrrverandi borgarstjórar, og voru raunar samherjar í borgarstjórnarmeirihluta árin 2010 til 2014.

Guðlaugur útstrikaðasti oddvitinn

Guðlaugur Þór Þórðarson, umhverfis-, orku- og loftslagsráðherra og oddviti Sjálfstæðisflokksins í Reykjavík norður, var strikaður út 209 sinnum af sínum kjósendum, og er því sá oddviti í borginni sem oftast var strikaður út.

Samráðherra hans og oddviti Sjálfstæðisflokksins í Reykjavík suður, Áslaug Arna Sigurbjörnsdóttir, var strikuð út æði sjaldnar, eða 89 sinnum.

Einn frambjóðandi er þó á milli Áslaugar og Guðlaugs á listanum. Það er Pawel Bartoszek, sem var í öðru sæti Viðreisnar í Reykjavíkurkjördæmi norður.

Íbúar á Norðurlandi vestra ekki útstrikunarglaðir

Norðvesturland er með fæsta þingmenn, einungis sjö talsins. Fimm flokkar fengu einn mann inn en Flokkur fólksins fékk tvo. Einn af þremur jöfnunarþingmönnum þeirra, Lilja Rafney Magnúsdóttir, er þar.

Íbúar þar voru ekki mikið að strika út. Stefán Vagn Stefánsson, þingmaður Framsóknarflokksins, var efstur með 61 útstrikun. Þar á eftir kom Lilja Rafney með 23.

Hér fyrir neðan má sjá lista með útstrikunum efstu frambjóðanda í þessum þremur kjördæmum.