Við­brögð við á­kvörðun Þórðar: „Þetta er mikil synd“

Þegar þessi frétt er skrifuð hefur færsla Þórðar á Facebook fengið rúmlega 800 læk, þá hafa rúmlega hundrað manns skrifað ummæli við hana og henni verið deilt 39 sinnum.

Meðal þeirra sem bregðast við færslunni eru skiljanlega margir félagar Þórðar í Samfylkingunni en einnig fólk úr öðrum áttum. Þar á meðal fjölmiðlamenn á borð við Frosta Logason, stjórnmálafólk úr öðrum flokkum, Jón Gnarr, Trausti Breiðfjörð og Mummi Týr, og ýmsir aðrir.

„Enginn má við forlögunum“

Flestir sem skrifa ummæli við færsluna sjá á eftir Þórði

„Æ, æ, þetta er mikil synd því þarna missa landsmenn af tækifæri til að fá á Alþingi einn af betri talentum sem þar hefur sóst eftir sæti nýlega,“ skrifar Vilhjálmur Þorsteinsson, fyrrverandi gjaldkeri Samfylkingarinnar og stofnandi Miðeindar.

Mörður Árnason, fyrrverandi þingmaður flokksins, skrifar „Vildi fá þig á þing, en enginn má við forlögunum.“

„Dapurt en á sama tíma til fyrirmyndar,“ skrifar Hulda Ásgeirsdóttir leikskólastjóri.

Karen Kjartansdóttir upplýsingafulltrúi segist hefðu kosið að sjá Þórð taka sæti á þingi og vonar hún að hann haldi áfram að miðla sinni dýrmætu reynslu og innsýn. „Lykilatriði í réttlátu og mannúðlegu samfélagi er að við treystum því að fólk geti breyst, lært af reynslu sinni og vaxið sem einstaklingar,“ skrifar hún.

„Uppgjör við þessa menningu var löngu tímabær en við verðum líka að tryggja að fólki sé gefið tækifæri til að þroskast og bæta fyrir mistök sín þegar það axlar ábyrgð af heilindum og hefur sýnt að það er annað en það var,“ skrifar hún einnig.

Fleiri ólust upp í moldarkofum feðraveldisins

Aðrir hrósa Þórði sérstaklega fyrir ákvörðunina og segja hana sýna hans innri mann.

„Þessi ákvörðun er þér til sóma,“ skrifar Guðmundur S. Brynjólfsson rithöfundur og tekur Helgi Seljan, fyrrverandi kollegi Þórðar á Heimildinni, í svipaðan streng: „Þú ert stærri og meiri en flestir gæskur. Þetta sýnir það bara. Allt að sólu“.

„Þetta er heiðarlega skrifað,“ skrifar Illugi Jökulsson, rithöfundur og útvarpsmaður, og deilir færslunni.

Teitur Örlygsson, körfuboltaspekúlant, lýsir einnig yfir ánægju með færsluna og segir hana fá mann til að hugsa um hve mikill munurinn er á „standard og eðlilegum prinsippum milli fólks og flokka í okkar litla landi“.

Biggi Veira tónlistarmaður þakkar Þórði fyrir færsluna og segir: „Það eru fleiri sem ólust upp moldarkofum feðraveldisins en sjá núna tilvistina alla í betra samhengi“.

„Til hamingju skrímsladeild Sjálfstæðisflokks“

Öðrum finnst rangt að Þórði skuli refsað fyrir gömul brot, segja slaufunarmenningu hafa gengið of langt, skrímsaldeildina hafa tekist ætlunarverk sitt og að vinstrimenn séu sínir eigin verstu óvinir.

Kristján Jóhannsson óperusöngvari lætur nægja að vitna í Biblíuna: „Sá yðar sem syndlaus er kasti fyrsta steininum“.

Halldór Laxness Halldórsson, grínisti og rithöfundur, vitnar í afsökunarbeiðni Þórðar í færslu á X og skrifar við hana „Að éta sjálfan sig. The vegan version.“

Á sama miðli skrifar Guðmundur Hörður Guðmundsson, kynningar- og vefstjóri Hugvísindasviðs HÍ, að í dag sé glatt í höfuðstöðvum útgerðar- og fjármálafyrirtækja og óskar skrímsladeild Sjálfstæðiflokks til hamingju. 

„Ég efast um að það sé til lélegra vinstri en það íslenska - það lætur skrímsladeildinni alltaf spila með sig,“ skrifar hann einnig.

Erlendur S. Þorsteinsson segir í X-færslu: „Vandamálið við það að góða fólkið taki ábyrgð á brestum sínum er að vonda fólkið gerir það ekki. Hvenær hyggst Miðflokkurinn og Klaustursveinar hans taka ábyrgð á skoðunum sínum og orðum?“

Gunnar Andreas Kristinsson tónskáld segir að pressan hljóti nú að færast yfir á Klaustursveina í annarri færslu.

Krakkarnir hjá veðmálafyrirtækinu Epicbet grínast með að Kristrún sé böðullinn að baki ákvörðun Þórðar, vísa í ummæli hennar um Dag B. Eggertsson og telja veðmálasíðuna vera næsta fórnarlamb hennar.