Sér­nám í bæklunar­lækningum á Heil­brigðis­stofnun Vestur­lands

Í tilkynningu á vef stjórnarráðsins segir að heilbrigðisráðherra hafi í mars á þessu ári skipað nýja mats- og hæfisnefnd um sérnám lækna, í samræmi við reglugerð nr. 856/2023. Meðal verka hennar er að meta hæfi heilbrigðisstofnana eða deilda innan þeirra til að öðlast viðurkenningu sem kennslustofnanir til að annast sérnám lækna, þ.m.t. sérnámsgrunn.

Nefndin kom fyrst saman í apríl á þessu ári og hefur nú, eftir úttekt á starfsemi og kennslu, veitt bæklunarlækningum á Heilbrigðisstofnun Vesturlands viðurkenningu sem kennslusérgrein og kennsludeild, í samvinnu við bæklunarlækningar á Landspítala.

Í tilkynningunni segir enn fremur að haustið 2022 hafi ný og fullkominn skurðstofa fyrir liðskiptaaðgerðir verið tekin í notkun á Sjúkrahúsinu á Akranesi. Síðan þá hafi afkastageta stofnunarinnar í liðskiptaaðgerðum tvöfaldast en 357 liðskiptaaðgerðir voru framkvæmdar á Sjúkrahúsinu á Akranesi á árinu 2023 og hafa aldrei verið fleiri hjá stofnuninni. Árið 2021 voru framkvæmdar 155 slíkar aðgerðir.