Ís­lendinga­liðið tryggði sér odda­leik

Fyrir leik kvöldsins hafði Sävehof unnið tvo leiki og Skara einn. Það var því ljóst að tap myndi þýða að þær Aldís Ásta Heimisdóttir og Jóhanna Margrét Sigurðardóttir, leikmenn Skara, væru á leið í sumarfrí líkt og liðsfélagar þeirra.

Það kom aldrei til greina og vann Skara fjögurra marka sigur þar sem Íslendingarnir tveir stóðu svo sannarlega fyrir sínu. Aldís Ásta skoraði fimm mörk í leiknum og Jóhanna Margrét tvö.

Liðin mætast aftur á fimmtudaginn kemur í hreinum úrslitaleik um hvort liðið kemst í úrslit gegn Önnereds sem lagði Skuru 3-1 í hinni undanúrslitarimmunni.