Sjáðu frá­bært mark hjá Arnóri Ingva sem dugði þó skammt

Norrköping tapaði 6-2 á móti AIK. Norrköping átti hræðilegan fyrri hálfleik þar sem AIK skoraði þrjú mörk.

Norrköping menn náðu að minnka muninn í eitt mark í byrjun síðari hálfleiks en komust ekki nær. Þeir fengu síðan þrjú mörk á sig á lokakafla leiksins.

Arnór skoraði annað markið og minnkaði þá muninn í 3-2 á 53. mínútu. Hann átti þá þrumuskot í slána og inn. Frábært mark sem má sjá hér fyrir neðan.

Arnór fór af velli á 82. mínútu og inn kom landi hans Ísak Andri Sigurgeirsson.

Þetta var fjórða markið hjá Arnóri í fyrstu sex leikjum tímabilsins en hann hefur skorað í fjórum síðustu leikjum sínum.

Þessi úrslit þýða að Norrköping situr í áttunda sæti deildarinnar en AIK komst upp í annað sætið, fjórum stigum á eftir toppliði Malmö.