Fyrstu hergögnin eiga að berast til Úkraínu á næstu klukku­stundum

Umrædd lög fela í sér aðstoð fyrir um sextíu milljarða dala en fyrstu sendingarnar til Úkraínu eru metnar á einn milljarð. Þær sendingar innihalda meðal annars flugskeyti í loftvarnarkerfi, skotfæri fyrir margskonar tegundir af stórskotaliði og sprengjuvörpur og hefðbundin skotfæri fyrir byssur og stærri byssukost fyrir loftvarnarkerfi sem notuð eru til að granda sjálfsprengidrónum.

Sjá einnig: Undir­búa stærðarinnar sendingar til Úkraínu

Einnig stendur til að senda Bradley-bryndreka til Úkraínu og skotfæri fyrir þá, bæði í vélbyssu þeirra og eldflaugar sem hannaðar eru til að granda skrið- og bryndrekum og styrktum byrgjum, annarskonar brynvarin farartæki sem hönnuð eru til að flytja hermenn og stuðningstæki, eins og bryndreka sem hannaðir eru til að draga skemmda og fasta skriðdreka.

Þá inniheldur fyrsti pakkinn eldflaugar eins og Javelin, sem hannaðar eru til að granda bryn- og skriðdrekum, sprengjur til að varpa úr flugvélum, jarðsprengjur sem hannaðar eru til að granda brynvörðum farartækjum og mönnum, nætursjónauka og ýmislegt annað.

Frumvarp um þessa hernaðaraðstoð hafði setið fast í bandaríska þinginu í hálft ár og hefur lítil aðstoð borist frá Bandaríkjunum á þeim tíma. Á sama tíma hafa Úkraínumenn verið undir sífellt meiri þrýstingi á víglínunni í austurhluta Úkraínu.

„Við vorum vandanum vaxin. Við komum saman og við kláruðum verkefnið,“ sagði Biden við undirskriftina í dag. Hann sagði að ferlið hefði verið langt og strembið og að nú skipti máli að hlutirnir gerðust hratt, samkvæmt frétt AP fréttaveitunnar.

New York Times sagði frá því í dag að Bandaríkjamenn hefðu í síðustu viku sent svokallaðar ATACMS eldflaugar í laumi til Úkraínu. Þær notuðu Úkraínumenn til að gera árásir á flugvöll á Krímskaga sem rússneski herinn notar og önnur skotmörk í suðausturhluta Úkraínu.

ATACMS stendur fyrir Army Tactical Missile System, en þar er um að ræða eldflaugar sem eiga að drífa allt að þrjú hundruð kílómetra, en það fer eftir því hvaða tegund ATACMS um er að ræða. Hægt er að skjóta þeim með HIMARS-eldflaugakerfum, sem Úkraínumenn hafa fengið frá Bandaríkjamönnum og Bretum.

Úkraínumenn hafa áður fengið sendingar af ATACMS frá Bandaríkjunum og eru sagðir hafa notað þær með góðum árangri gegn birgðastöðvum, stjórnstöðvum og flugvöllum sem Rússar nota. Úkraínumenn segjast hafa grandað nokkrum loftvarnarkerfum af gerðinni S-400 í árásunum, auk ratsjáa og stjórnstöð.

Biden er sagður hafa samþykkt þessa sendingu í Mars og þá bárust fregnir af því að til stæði að senda ATACMS til Úkraínu.

Sjá einnig: Senda fleiri eldflaugar og fallbyssur til Úkraínu

Fregnir hafa áður borist af því að Bandaríkjamenn eigi tiltölulega fáar ATACMS. Þær eru framleiddar af Lockheed Martin sem getur einungis framleitt um fimm hundruð á ári og hafa flestar þeirra verið ætlaðar vinveittum ríkjum Bandaríkjanna.

Í frétt NYT segir hins vegar að Biden hafi samþykkt að senda rúmlega hundrað ATACMS sem drífa allt að þrjú hundruð kílómetra, auk eldflauga sem drífa styttra en bera klasasprengjur.

Þetta ku hafa verið hægt vegna þess að hætt var við að selja margar eldflaugar til annarra ríkja og forsvarsmenn bandaríska hersins höfðu því minni áhyggjur af skorti hjá þeim.