Hikandi við að mæta Ísrael „vegna þess sem þeir hafa gert við sak­lausa borgara“

Leikurinn við Ísrael fer fram 21. mars í Búdapest. Dregið var um hvort liðanna yrði á heimavelli og höfðu Ísraelar heppnina með sér. Þeir kröfðust þess að leikið yrði í Ísrael en knattspyrnusamband Íslands tók það ekki í mál og lendingin varð sú að spila í Ungverjalandi.

„Ættum ekki að vera að spila þennan leik“

En telur Hareide að KSÍ hefði átt, eða ætti, að ganga lengra í að þrýsta á að leikurinn verði ekki spilaður?

„UEFA [Knattspyrnusamband Evrópu] sér um allar reglurnar í þessu og við erum hluti af UEFA. Ef að við spilum ekki þá förum við í bann og eigum á hættu frekari refsingu, með því að spila ekki við aðra aðildarþjóð.

En ef þú spyrð mig persónulega þá myndi ég hika við að spila við Ísrael, eins og staðan er núna. Vegna þess sem er í gangi á Gasa, og vegna þess sem þeir hafa gert við konur, börn og aðra saklausa borgara. Það ætti ekki að vera gert, og við ættum ekki að vera að spila þennan leik ef þú spyrð mig. En við verðum að spila því afleiðingarnar yrðu svo miklar fyrir Ísland ef við gerðum það ekki,“ segir Hareide.

Vegna afstöðu UEFA og FIFA, sem ekki hafa bannað Ísrael frá alþjóðlegri keppni, þykir ljóst að Ísrael færi einfaldlega áfram í úrslitaleik umspilsins, 26. mars, ef Ísland myndi sniðganga leikinn. Í húfi er sæti á EM, sem þar með yrði þriðja stórmótið í sögu karlalandsliðs Íslands, og 1,4 milljarðar króna fyrir KSÍ.

„Fótboltamenn en ekki hermenn“

Hareide segir of mikið í húfi fyrir Ísland og að hafa verði hugfast að leikmenn Ísraels séu ekki hermenn.

„Við verðum að skipta um hugarfar og hugsa með okkur að ísraelsku leikmennirnir eru ekki hermenn. Ef þeir yrðu spurðir þá horfir eðlilegt fólk á myndirnar frá Gasa og veit að þetta er ekki rétt. Svona lagað á ekki að gera gagnvart saklausu fólki.

Þetta er mjög, mjög erfitt og það er erfitt fyrir mig að þurfa að sleppa því að hugsa um þessar myndir sem við sjáum á hverjum degi, og hugsa um Ísrael sem fótboltalið. Að þetta sé leikur og að ísraelsku leikmennirnir séu fótboltamenn en ekki hermenn, þó að þeir séu fulltrúar þjóðar. Þetta er eflaust erfið staða fyrir þá líka.

Við verðum að undirbúa okkur með réttum hætti, leggja til hliðar allt sem er í gangi í kringum okkur, og einbeita okkur að því að vinna leikinn. Það er mikilvægt fyrir Ísland og íslenskan fótbolta,“ segir Hareide.