Innlent

Sára­lítið mælist af loðnu

Magnús Jochum Pálsson skrifar
Uppsjávarskipin Ásgrímur Halldórsson, Heimaey og Polar Ammassak hafa tekið þátt í loðnumælingum undanfarið.
Uppsjávarskipin Ásgrímur Halldórsson, Heimaey og Polar Ammassak hafa tekið þátt í loðnumælingum undanfarið.

Önnur yfirferð loðnumælinga á árinu er langt komin og segir í tilkynningu Hafrannsóknarstofnunnar að „mjög lítið“ hafi mælst af loðnu. Eftir standi að fara yfir Vestfjarðamið og Suðausturmið.

Þetta kemur fram í tilkynningu frá Hafrannsóknarstofnun. Þar segir að þrjú uppsjávarveiðiskip hafi tekið þátt í yfirferð á loðnumælingum. 

Skipin Heimaey og Polar Ammassak hafi þurft frá að hverfa af Vestfjarðamiðum um helgina vegna veðurs. Áætlað er að yfirferðinni ljúki á miðvikudaginn. Ásgrímur Halldórsson hafi lokið við sína yfirferð úti fyrir Norðaustur- og Austurlandi um helgina.

„Þótt yfirferðinni sé ekki lokið vill Hafrannsóknastofnun upplýsa strax að mjög lítið hefur mælst af loðnu það sem af er þessari febrúarmælingu. Gert er ráð fyrir frekari vöktun og yfirferð að þessum mælingum loknum en fyrirkomulag þeirra skýrist seinna í vikunni,“ segir í tilkynningunni.

Svæðin sem verði þá líklegast lögð áhersla á séu norðvestur af landinu og undan Vestfjörðum ásamt Suðausturmiðum. Kristján Már Unnarsson ræddi við Birki Bárðarson, fiskifræðing og leiðangursstjóra Hafrannsóknunarstofnunar, um loðnuleitina í síðustu viku.

Sjávarútvegur Hafið Loðnuveiðar
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið