Glatað að vera niður­lægður á al­manna­færi

Langbest birti færslu á Facebook-síðu sinni fyrr í dag þar sem þau greindu frá atvikinu.

„Það atvik gerðist á veitingastað okkar að blindur einstaklingur kom til okkar ásamt leiðsöguhundi sínum. Á Langbest er það yfirlýst stefna að gæludýr eru ekki leyfð yfir höfuð og því varð uppi fótur og fit hvort gefa ætti undanþágu vegna þessa aðstæðna,“ segir í færslunni.

„Satt best að segja þá vorum við á Langbest illa upplýst um að það væru lög í landinu sem banna að aðskilja leiðsöguhunda frá eigendum sínum og hikuðum við að bjóða hann velkominn á staðinn. Við það yfirgáfu þessir gestir staðinn okkar verulega ósáttir, skiljanlega,“ segir jafnframt.

„Af því tilefni viljum við öll á Langbest biðjast afsökunar á þessum mistökum okkar og viljum að það komi skýrt fram að allir leiðsöguhundar blindra einstaklinga eru velkomnir á veitingastað okkar. Það er mikilvægt að koma þessum skilaboðum á framfæri sem víðast þannig að sem flestir séu upplýstir um þessi mál,“ segir að lokum í færslunni.

Bæði í ósamræmi við lög og niðurlægjandi

Þegar skoðað er hverjir hafa deilt færslu Langbest kemur í ljós að Már Gunnarsson, Ólympíufari og söngvari, er sá sem lenti í þessu leiðinlega atviki. Már sem hefur áður talað hispurslaust um reynslu sína af því að vera blindur einstaklingur deildi færslunni fyrir skömmu og greinir frá sinni hlið af atvikinu.

„Nú fyrir helgi gerðist það í fyrsta skipti á Íslandi að mér og leiðsöguhundinum Max var meinaður aðgangur að veitingarstað. Við fjölskyldan höfðum hugsað okkur að eiga saman ánægjulega stund áður enn ég færi aftur út til Englands en augljóslega settu þessar móttökur strik í reikninginn!“ skrifar hann í færslunni.

„Það er eitt að þetta er í ósamræði við lög, en tilfinningalega er það glatað að fá svona höfnun og niðurlægingu á almannafæri í andlitið þegar maður er að gera sitt besta að lifa eðlilegu og sjálfstæðu lífi sem blindur einstaklingur!“ segir Már jafnframt.

Már segist hafa fengið hringingu frá eiganda Langbest snemma morguns daginn eftir atvikið. Hann hafi verið miður sín yfir atvikinu og beðist innilega afsökunar fyrir hönd staðarins. Enn fremur vildi eigandinn koma skilaboðum á framfæri svo aðrir veitingastaðir myndu læra af mistökum þeirra.

„Ég kann að meta þessi skjótu viðbrögð og hlakka til að mæta með Max á Langbest, fá mér m.a brauðstangir þegar ég verð á landinu næst!“ skrifar Már að lokum.

Ekki náðist í Langbest við skrif fréttarinnar.