Erlent

Hæfðu flótta­manna­búðir á Gasa þar sem mann­fall nálgast 22 þúsund

Eiður Þór Árnason skrifar
Palestínsk kona sem særðist í árásum Ísraels í gær leitaði sér læknishjálpar á spítala á suðurhluta Gasa.
Palestínsk kona sem særðist í árásum Ísraels í gær leitaði sér læknishjálpar á spítala á suðurhluta Gasa. Ap/Mohammed Dahman

Herflugvélar á vegum Ísraelshers hæfðu tvær flóttamannabúðir á miðri Gasaströndinni í dag og er lítið útlit fyrir að nokkurt hlé verði gert á átökum fyrir botni Miðjarðarhafs. Mannfall þar er nú sagt nálgast 22 þúsund manns. Hátt settur ráðamaður innan Hamas segir samtökin enn standa fast á því að fleiri gíslum verði ekki sleppt úr haldi þeirra fyrr en komið verði á ótímabundnu vopnahléi á svæðinu.

Samrýmist sú krafa ekki nýlegri tillögu ráðamanna í Egyptalandi sem hafa reynt að miðla málum milli Hamas og ísraelskra stjórnvalda til að binda enda á blóðugu átökin sem nálgast nú þriðja mánuð.

Talið er fullvíst að Ísraelsmenn komi til með að hafna kröfum Hamas en stjórnvöld þar hafa sagt stöðvun átaka nú jafngilda sigri Hamas. Ísraelsstjórn hefur heitið því að halda stórfelldum loft- og landhernaði sínum á Gasaströndinni áfram þar til samtökin hafi verið leyst upp.

Palestínskur maður ber lík skyldmennis sem fórst í árás Ísraels á suðurhluta Gasa í gær.Ap/Fatima Shbair

Bandaríkjastjórn hefur stutt Ísrael dyggilega í þessum efnum á alþjóðavettvangi en ríkisstjórn Joe Biden hefur á sama tíma kallað eftir því að Ísraelsher geri meira til þess að komast hjá frekara mannfalli meðal Palestínskra borgara.

AP-fréttaveitan greinir frá þessu en talið er að um 85% af 2,3 milljónum íbúa Gasa séu nú á vergangi. Stríðið hófst í kjölfar mannskæðrar árásar Hamas í suðurhluta Ísrael þann 7. október. Síðan þá hefur mikill fjöldi Palestínumanna leitað skjóls á svæðum á Gasa sem hafa síðar orðið fyrir árásum Ísraels, þrátt fyrir yfirlýsingar þeirra um að svæðin ættu að teljast örugg.

Palestínumenn við rústir eftir árás Ísraelshers í Rafah á suðurhluta Gasa í gær.Ap/Fatima Shbair

Samþykktu aukna vopnasölu

Heilbrigðisráðuneytið á Gasa, sem er undir stjórn Hamas, gaf út í dag að 21.672 Palestínumenn hafi farist frá því að stríðsátökin hófust í október og 56.165 aðrir særst. Talsmaður ráðuneytisins bætti við að 165 hafi farist á síðastliðnum sólarhring. Ekki er gerður greinarmunur á andlátum bardagamanna og almennra borgara í tölunum en heilbrigðisyfirvöld hafa sagt um 70% hinna látnu vera konur og börn.

Sum af nýjustu andlátunum voru tilkynnt í kjölfar áðurnefndra loftárása Ísraelshers á Nuseirat og Bureij flóttamannabúðirnar sem gerðar voru aðfaranótt laugardags og fram á laugardag.

Utanríkisráðuneyti Bandaríkjanna samþykkti í gær að selja hergögn til Ísraels fyrir 147,5 milljónir Bandaríkjadala, til viðbótar við fyrri vopnasölu og fjárhagsaðstoð.

Ísraelskir hermenn tóku sér stöðu Ísraelsmegin við ytri mörk Gasastrandarinnar í gær.Ap/Ariel Schalit
Átök í Ísrael og Palestínu Ísrael Palestína

Tengdar fréttir

Gefur ekkert fyrir tal um ómöguleika og vill senda út fulltrúa til að hjálpa

Ríkisstjórnin segir í skoðun hvernig hægt sé að ná fólki með dvalarleyfi á Íslandi út úr Gasa en dómsmálaráðherra segir stöðuna flókna og að horft sé til hinna Norðurlandaþjóðanna og fullyrðir að þar hafi engar fjölskyldusameiningar átt sér stað. Íslensk baráttukona gefur lítið fyrir tal um ómöguleika og segir að Ísland þurfi, eins og aðrar þjóðir, að senda sinn fulltrúa út til hjálpar fólkinu.

Tugþúsundir flýja miðhluta Gasa

Um 150 þúsund Palestínumenn hafa nú verið neyddir til að flýja miðhluta Gasasvæðisins undan Ísraelsher sem gerir nú atlögu að flóttamannabúðum á svæðinu.

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið