Jóla­­ísarnir frá Skúbb eiga eftir að slá í gegn

Í ár ætlar Skúbb að gera enn betur því auk hins klassíska jólaíss verður einnig boðið upp á glænýjan jólaís sem ber það skemmtilega nafn Skúbblerone. „Gamli góði jólaísinn okkar hefur fengið mjög góðar viðtökur undanfarin ár og hefur alltaf selst upp,“ segir Jón Jóhannsson, rekstrarstjóri hjá Skúbb. „Hann er hrikalega góður og inniheldur meðal annars möndlur sem við ristum sjálf og karamellusúkkulaði sem við bökum í ofni. Þannig að það er heldur betur nostrað við þennan ís og engin ástæða að hrófla við uppskriftinni milli ára.“

Þrátt fyrir það vildi Skúbb prófa sig áfram og auka úrvalið af jólaísum. „Fyrir valinu varð Skúbblerone en eins og nafnið gefur til kynna inniheldur hann Toblerone súkkulaði sem margir Íslendingar tengja einmitt við jólin auk þess sem við notum líka smá karamellusúkkulaði úr gamla góða jólaísnum okkar. Þetta er geggjaður ís sem á örugglega eftir að slá í gegn eins og sá klassíski. Kannski bætum við bara þriðja jólaísnum við á næsta ári?“

Jólaísarnir eru komnir í sölu í Hagkaup, Krónunni, Melabúðinni, Fjarðarkaup og verslunum Samkaupa sem eru Nettó, Iceland, Krambúðin og Kjörbúðin. „Svo fást þeir auðvitað í ísbúðinni okkar á Laugarásvegi 1 í Reykjavík. Við ætlum einnig að bjóða upp á Skúbblerone ístertur frá miðjum desember en þær verða bara í boði í verslun okkar. Þær eru handgerðar og framleiddar í takmörkuðu upplagi þannig að það er veisla framundan.“

Galdurinn á bak við bragðgæði íssins frá Skúbb er sá að hann er handgerður úr lífrænni ófitusprengdri mjólk frá Biobú. „Ísinn okkar inniheldur lífræna mjólk auk þess sem við forðumst öll aukaefni í framleiðslunni. Það skiptir líka miklu máli að við notum alvöru hráefni við gerð íssins, eins og til dæmis ferska myntu frá Friðheimum, lífrænar kaffibaunir og ferska ávexti. Flestar aðrar vörur sem eru á boðstólum, eins og sósur og smákökur, eru gerðar á staðnum út frá sömu hugmyndafræði. Skúbb er sannkallaður verðlaunaís en hann hefur verið valinn sá besti í Reykjavík af The Reykjavík Grapevine sl. sjö ár.“

Skúbb hefur sótt um lífræna vottun fyrir þá ísa sem hægt er að bjóða upp á lífræna. „Þetta er langt og strangt ferli en við erum bjartsýn á að geta boðið upp á a.m.k. tvær lífrænt vottaðar tegundir fyrir áramót.“

Nánari upplýsingar á skubb.is.