Erlent

Gísla­töku­maður skotinn til bana af lög­reglu í Noregi

Atli Ísleifsson skrifar
Gíslatökumaðurinn var fluttur særður á háskólasjúkrahúsið í Stafangri þar sem hann var úrskurðaður látinn.
Gíslatökumaðurinn var fluttur særður á háskólasjúkrahúsið í Stafangri þar sem hann var úrskurðaður látinn. Getty

Lögregla í Stafangri í Noregi skaut í gærkvöldi karlmann á fimmtugsaldri til bana eftir að sá hafði rænt bíl, tekið ökumanninn í gíslingu og skotið í átt að lögreglu. Lögreglumaður og gíslinn særðust einnig í skotbardaganum.

Norskir fjölmiðlar segja frá því að atvikið hafi átt sér stað um klukkan 22:30 að staðartíma í gærkvöldi. Maðurinn hafði þar ekið bíl sínum og rekist á annan bíl þar sem í voru tveir fullorðnir og tvö börn.

Eftir áreksturinn hafi maðurinn, sem var vopnaður, farið inn í annan bíl og tekið ökumanninn í gíslingu. Lögregla hafði svo fljótlega upp á bílnum og veitti honum eftirför.

Maðurinn skaut þá úr byssu sinni, út um glugga bílsins og í átt að lögreglu, að því er segir í fréttatilkynningu frá vettvangsstjóra lögreglu í nótt. Lögregla skaut á móti og lauk bardaganum með því að maðurinn, gíslinn og einn lögreglumaður höfðu allir orðið fyrir skoti. 

Gíslatökumaðurinn var fluttur særður á háskólasjúkrahúsið í Stafangri þar sem hann var úrskurðaður látinn.

Fram kemur í frétt NRK að lögreglumaðurinn hafi verið skotinn í bringuna en skotið hafnaði í skotheldu vesti sem hann klæddist svo hann slasaðist ekki. Ennfremur segir að gísl mannsins hafi einnig orðið fyrir skoti, en ekki særst alvarlega.

Noregur
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið