Höttur vann sinn annan leik í Subway-deildinni á tímabilinu þegar liðið lagði Breiðablik á heimavelli sínum á fimmtudagskvöldið. Hinn síungi Everage Richardsson var besti maður Blika í leiknum en hann skoraði 22 stig og tók 11 fráköst í 80-73 sigri Hattarmanna.
Richardsson varð fyrir því óláni í leiknum að fara úr lið á fingri. Einhverjir hefðu eflaust kastað inn hvíta handklæðinu í kjölfarið en Richardsson var ekki á þeim buxunum.
Hann fékk einfaldlega aðstoð frá sjúkraþjálfara Hattar við að kippa fingrinum aftur í lið og hélt síðan leik áfram. Töluverðan tíma tók að koma fingrinum aftur í lið og kom Viðar Hafsteinsson, þjálfari Hattar, meðal annars til aðstoðar.
„Algjört vesen að koma honum í liðinn,“ sagði Helgi Már Magnússon sérfræðingur í Subway Körfuboltakvöldi en atvikið var rætt í síðasta þætti.
„Það er ekki eins og þetta hafi tekist í fyrstu tilraun, hvað er þetta tólfta tilraunin. Engin svipbrigði á honum,“ bætti Ómar Örn Sævarsson við.
Myndband af atvikinu má sjá hér fyrir neðan.
