Verðgátt Rannsóknarseturs verslunarinnar og menningar- og viðskiptaráðuneytisins var sett í loftið í gær. Þar geta neytendur borið saman verð sjötíu og fjögurra neysluvara hjá þremur verslunum. Bónus, Krónunnar og Nettó.
Við fyrstu sýn virðist Verðgátt þessi ekkert sérstaklega nytsamleg þar sem oftar en ekki munar einungis einni krónu á verði milli verslana. Þá er einungis 182 krónum á dýrustu og ódýrustu körfunni.
Samkvæmt könnuninni mun ódýrasta matarkarfan vera í Krónunni og séu allar vörur Verðgáttarinnar settar í körfuna kosta þær 42.127 krónur þar. Í Bónus er hún 91 krónu dýrari og í Nettó 182 krónum dýrari.
Verðlagseftirlit ASÍ skoðaði gáttina og verðþróun síðustu daga á þeim vörum sem þar má sjá. Verkefnastjóri eftirlitsins segir gögnin sýna að verslanirnar hafi aðlagað verð sín að hvorri annarri dagana áður en gáttin fór í loftið.
„Rétt áður en að hún er opnuð fyrir almenningi verður mikil verðþjöppun. Sumar vörur hækkaðar í verði og aðrar lækkaðar þannig að verðbilið heilt yfir minnkar mjög mikið. Þetta er annars vegar áhyggjuefni vegna þess að þetta lætur það líta út fyrir að vöruverð í verslunum sé mjög svipað þegar okkar verðkannanir sýna að það er talsvert meiri almennur verðmunur,“ segir Benjamín Julian, verkefnastjóri verðlagseftirlits ASÍ.
Mest áberandi dæmið um verðþjöppunina má sjá þegar verð jarðarberja er skoðað. Verðið helst nokkuð stabílt í nokkra daga fyrir birtingu Verðgáttarinnar. Svo sama dag og hún fer í loftið lækkar Krónan sitt verð um rúm 34 prósent. Á sama tíma hækkar Nettó sitt verð um fimmtán prósent. Eftir breytinguna eru þá allar verslanir með nokkuð svipað verð.
En þrátt fyrir svipað verð er ekki alltaf víst að vörurnar séu til í öllum verslum.
„Ég labbaði hér inn í dag og einhverjar vörur sem voru birtar í gáttinni voru ekki til. En það voru aðrar tegundir af vörunni sem voru þrisvar sinnum dýrari. Þannig maður þarf að hafa auga með því líka. Þetta er áskorun til neytenda þegar þeir fara út í búð að gæta að verðinu á öllum vörum sem þeir kaupa,“ segir Benjamín.
