Vinnslustöðin lagði ríkið í makrílbaráttu upp á milljarða króna

Kolbeinn Tumi Daðason skrifar 6. júní 2023 15:33

Sigurgeir B. Kristgeirsson, framkvæmdastjóri Vinnslustöðvarinnar. Vinnslustöðin

Íslenska ríkið hefur verið dæmt til að greiða sjávarútvegsfyrirtækinu Vinnslustöðinni rúman milljarð króna í bætur vegna úthlutunar aflaheimilda á makríl á árunum 2011 og 2018. Vinnslustöðin og Huginn stefndu ríkinu en Vinnslustöðin keypti svo Huginn árið 2021 á meðan málsókninni stóð.

Forsaga málsins er sú að sjö fyrirtæki kröfðust rúmlega tíu milljarða króna af íslenska ríkinu vegna aflaheimildanna. Fimm af fyrirtækjunum sjö féllu frá málsókn sinni til að sýna samstöðu vegna kórónuveirufaraldursins. Katrín Jakobsdóttir forsætisráðherra hafði sagt það eðlilega kröfu enda væri allt samfélagið að sýna ábyrgð á erfiðum tímum.

„En þá verður maður líka reiður þegar fyrirtæki í sjávarútvegi gera kröfu á ríkið upp á ríflega tíu milljarða króna vegna makrílúthlutunar. Það er ekki góð leið til þess að efla samstöðu í samfélaginu,“ sagði Katrín í pontu Alþingis og var ekki skemmt yfir kröfunni. Bjarni Benediktsson fjármálaráðherra sagðist hafa væntingar til þess að ríkið ynni málið. Bjarni lagði áherslu á að reikningurinn yrði greiddur af greininni, ekki skattgreiðendum.

Eskja, Gjögur, Ísfélag Vestmannaeyja, Loðnuvinnslan og Skinney-Þinganes féllu frá málsókninni en Huginn og Vinnslustöðin í Vestmannaeyjum héldu henni til streitu.

Héraðsdómur Reykjavíkur komst í dag að þeirri niðurstöðu að íslenska ríkið bæri skaðabótaábyrgð vegna þess að Huginn og Vinnslustöðinni hefði verið úthlutað minni aflaheimildum á þessu tímabili en skylt var samkvæmt lögum um fiskveiðar utan lögsögu Íslands.

Fór svo að ríkið var dæmt til að greiða Huginn 329 milljónir króna auk dráttarvaxta. Ríkið þarf að greiða Vinnslustöðinni um 515 milljónir króna í bætur auk dráttarvaxta. Huginn er í dag í eigu Vinnslustöðvarinnar.

Heildarupphæðin sem ríkið þarf að greiða Vinnslustöðinni mun því á endanum, að dráttarvöxtum meðtöldum, rúmum milljarði króna.

Koma verður í ljós hvort ríkið áfrýi dómunum tveimur til Landsréttar.

Uppfært klukkan 16:29

Í fyrri útgáfu stóð að heildarupphæðin væri nærri tveimur milljörðum króna. Hið rétta er að upphæðin er nær einum milljarði króna.

Sjávarútvegur Dómsmál Vestmannaeyjar

Tengdar fréttir

Huginn vill halda kröfunni til streitu en Vinnslustöðin fundar síðdegis

Fimm útgerðir af sjö sem stóðu að málsókn á hendur íslenska ríkinu vegna úthlutun makrílaflaheimilda ákváðu í gær að falla frá henni.

16. apríl 2020 13:09

Segir ummæli fjármálaráðherra ekki ganga upp í réttarríki

Stjórn Vinnslustöðvarinnar í Vestmannaeyjum hefur hingað til verið einhuga um að halda til streitu kröfu um bætur vegna úthlutunar veiðiheimilda á makríl. Horft verði þó til orða forsætisráðherra en stjórn fundar um málið á morgun.

15. apríl 2020 19:45

Ætla að „lúra“ á ákvörðun um makrílmálsókn

Engin ákvörðun var tekin um hvort málsókn Vinnslustöðvarinnar gegn íslenska ríkinu vegna úthlutunar makrílkvóta verði haldið til streitu á stjórnarfundi síðdegis í dag. Framkvæmdastjóri Hugins vill halda málinu áfram.

16. apríl 2020 20:52

Vinnslustöðin fær að kaupa félög sem veltu fjórum milljörðum

Samkeppniseftirlitið hefur heimilað kaup Vinnslustöðvarinnar í Vestmannaeyjum á Útgerðarfélaginu ÓS og fiskvinnslunnar Leo Seafood. Hluthafar ÓS og Leo Seafood nýta hluta af kaupverðinu til að byggja upp landeldi í Vestmannaeyjum.

14. apríl 2023 10:40

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.