Aðildarfélög BSRB undirrita kjarasamninga

Atli Ísleifsson skrifar 30. mars 2023 12:53

Úr húsakynnum ríkissáttasemjara í dag. BSRB

Aðildarfélög BSRB hafa náð samkomulagi um launahækkanir og kjarabætur fyrir starfsfólk í almannaþjónustu við ríki og Reykjavíkurborg. Um skammtímasamninga er að ræða sem gilda í tólf mánuði frá 1. apríl 2023.

Í tilkynningu frá BRSB segir að forsvarsfólk fjórtán aðildarfélaga BSRB undirriti í kjölfarið kjarasamningana í húsi ríkissáttasemjara en undir þau falla um 14 þúsund félagsmenn. Stéttafélagið Sameyki hefur þegar undirritað sína samninga við ríki og borg.

Samningarnir fara nú í kynningu og í kjölfarið í atkvæðagreiðslu í félögunum sem lýkur 14. apríl.

Sonja Ýr Þorbergsdóttir er formaður BSRB. BSRB

Haft er eftir Sonju Ýr Þorbergsdóttur, formanni BRSB, að leiðarljós félagsins í þessum viðræðum hafi verið að verja kaupmátt starfsfólks í almannaþjónustu, enda sé verðbólgan farin að bíta almenning verulega og langt síðan fólk á almennum vinnumarkaði hafi fengið sínar kjarabætur.

„Við fögnum því að kjarasamningur taki við af kjarasamningi svo launafólk fái ávinninginn af samningunum strax í vasann 1. maí. Rétt eins og á almenna markaðinum er um skammtímasamninga að ræða og svo hefst fljótlega undirbúningur fyrir gerð langtímakjarasamninga hjá aðildarfélögum BSRB. Kröfur okkar munu ekki eingöngu beinast að launagreiðendum heldur einnig stjórnvöldum,“ segir Sonja Ýr í tilefni af samkomulaginu.

Stéttarfélögin sem samkomulagið nær til:

Félag flugmálastarfsmanna ríkisins
Félag opinberra starfsmanna á Austurlandi
FOSS - stéttafélag í almannaþjónustu
Félag starfsmanna stjórnarráðsins
Kjölur, stéttarfélag starfsmanna í almannaþjónustu
Landssamband lögreglumanna
Landssamband slökkviliðs- og sjúkraflutningamanna
Sameyki - stéttarfélag í almannaþjónustu
Sjúkraliðafélag Íslands
Starfsmannafélag Garðabæjar
Starfsmannafélag Kópavogs
Starfsmannafélag Húsavíkur
Starfsmannafélag Suðurnesja
Starfsmannafélag Vestmanneyja

Kjaraviðræður 2022-23 Kjaramál Vinnumarkaður

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir