Stappar stálinu í félagsmenn VG í formannsræðu í skugga úrsagna

Landsfundur Vinstri grænna hófst í Hofi á Akureyri í dag en búist er við að um tvö hundruð manns sæki fundinn nú um helgina. Kosið verður til stjórnar og flokksráðs. Að minnsta kosti verður tekist á um tvö embætti í stjórn; ritara og gjaldkera. 

Hér er hægt að kynna sér dagskrá landsfundarins: Landsfundur VG á Akureyri

Þrjátíu hafa skráð sig úr VG á síðustu tveimur dögum eða frá samþykkt útlendingarfrumvarps. Fyrsti þungavigtarfélaginn til að kveðja flokkinn var Daníel E. Arnarsson, varaþingmaður. Á landsfundinum er hópur VG-liða sem ósáttur er við frumvarpið. Daníel sendir þeim þessi skilaboð.

„Látiði í ykkur heyra. Það er bara þannig. Vinstri græn er stjórnamálaflokkur og þar á að takast á, stjórnmál snúast um það. Nota rök með virðingu fyrir hvert öðru en líka að átta sig á því að stundum er bara komið nóg, eins og hjá mér. Ég fékk fólk til að ganga til liðs við mig og hreyfinguna á þeim forsendum að ég vildi bæta kjör þessa hóps og þegar hreyfingin mín gerir akkúrat öfugt þá er það bara ábyrgðarhluti hjá mér að stíga til hliðar,“ segir Daníel.

Bjartur Steingrímsson, sem lengi var virkur í ungliðastarfi flokksins og á lista hans í Mosfellsbæ sagði síðan skilið við VG í dag.

„Það er alltaf mjög leitt þegar leiðir skilja í stjórnmálum og einhverjir af þessum félögum myndi ég telja til minna vina og góðra félaga þannig að það er auðvitað mjög leiðinlegt,“ sagði Katrín.

Katrín segir að þingmenn VG hafi unnið að málinu af miklum heilindum og það tekið miklum breytingum að kröfu vinstri grænna. Í formannsræðu Katrínar á landsfundinum nú síðdegis stappaði hún stálinu í sitt félagsfólk nú þegar flokkurinn mælist ekki eins vel og áður.

Hvetur sitt fólk til dáða

Í formannsræðu sinni stappaði hún stálinu í félagsfólk sitt og hvatti það til að láta mótvindinn ekki buga sig og vísaði þar til verra gengis í skoðanakönnunum undanfarið. 

„Það er alltaf hætta á þreytu þegar flokkar hafi verið lengi við stjórnvölinn. Við liggjum lágt í skoðanakönnunum og finnum að mótvindurinn um þessar mundir er allnokkur. Ég hef hins vegar verið félagi í þessari hreyfingu ansi lengi – eða 21 ár – og ef ég þekki okkur rétt látum við mótvindinn ekki buga okkur. En í mótvindi getur verið gott að staldra við og leggja nýtt mat á stöðuna, finna bestu leiðina fram á við og halda svo ótrauð áfram.“

Staðan í efnahagsmálum var fyrirferðamikil í ræðu Katrínar enda stór verkefni framundan.

„Verkefni númer 1, 2 og 3 núna er að ná verðbólgunni niður. Það verður einungis gert með samstilltum aðgerðum allra. Ríkistjórnin hefur beitt ríkisfjármálunum til að vinna gegn þenslunni en á sama tíma styðja þá hópa sem eiga erfiðast með að mæta áhrifum verðbólgunnar og það munum við gera áfram.“

Katrín sagði hreyfinguna hafa góð áhrif á samfélagið, langt umfram stærð hennar. 

„Ég gæti staðið hér frameftir kvöldi og þulið upp hluti eins og þrepaskipt skattkerfi, eflingu barnabótakerfisins, eflingu almenna íbúðakerfisins, friðlýst svæði um land allt, fullfjármagnaða aðgerðaáætlun í loftslagsmálum, ný jafnréttislög, lögin um kynrænt sjálfræði, minni skerðingar í almannatryggingakerfinu, bætta réttarstöðu brotaþola, ný lagaákvæði um umsáturseinelti og kynferðislega friðhelgi, minni greiðsluþátttöku sjúklinga og stóreflingu heilsugæslunnar, Landspítala og Sjúkrahússins á Akureyri, lög um farsæld barna sem nálgast þau málefni með algjörlega nýjum hætti í þágu barna, ný þungunarrofslöggjöf, lenging fæðingarorlofs og stytting vinnuvikunnar. Ég gæti haldið lengi áfram – en á því leikur enginn vafi að við höfum haft ómæld áhrif á samfélagið með þátttöku okkar í ríkisstjórn, langt umfram stærð okkar.“