Kylfingarnir þrír voru í kjölfar Íslandsmóts eldri kylfinga, sem haldið var dagana 14. til 16. júlí síðastliðinn á Jaðarsvelli á Akureyri, kærðir til aganefndar GSÍ fyrir að hafa staðfest rangt skor.
Til að gera langa sögu stutta dæmdi dómari mótsins, Tryggvi Jóhannesson, tvö víti á þá Helga Svanberg Ingason og Kristján Ólaf Jóhannesson, fyrir að brjóta þá staðareglu að taka æfingapútt á flöt eftir að hafa klárað holuna. Margeir, sem var með þeim Helga og Kristjáni í ráshóp, mótmælti þessu á þeim forsendum að þessari staðareglu hafi ekki verið komið á framfæri við kylfinga með fullnægjandi hætti og að allir væru að gera þetta.
Ráshópurinn skilaði þá inn skorkortum eftir hring, eins og lög gera ráð fyrir en tóku í engu tillit til dóms Tryggva sem þá leiddi til frávísunar þeirra þriggja. Í kjölfarið voru þremenningar kærðir til aganefndar GSÍ. Vísir hefur fjallað ítarlega um málið og kæruna:
Tveir vildu ekki una úrskurði aganefndar
Kylfingarnir þrír voru allir úrskurðaðir í árs langt keppnisbann frá öllum mótum innan GSÍ af aganefnd sambandsins. Bann þeirra tók gildi þann 30. september í fyrra og því ljóst að þeir myndu þurfa að sitja hjá í öllum mótum komandi keppnistímabils.
Þessu vildu þeir Kristján Ólafur og Margeir ekki una og því kærðu þeir úrskurðinn til dómstóls GSÍ.
Í niðurstöðum dómsins segir að óumdeilt sé að þeir Kristján Ólafur og Helgi Svanberg hafi tekið æfingapútt á flöt eftir að hafa klárað 17. holu. Þá verði einnig að telja sannað að dómari mótsins hafi vítað þá báða og að Margeir hafi vitað af því.
„Allir leikmenn í því holli sem um ræðir eru reyndir golfspilarar. Verður að gera kröfu til þess að þeir þekki golfreglurnar og meðal annars þá reglu sem fram kemur í grein 20.2 a að leikmönnum beri að fylgja úrskurði dómara um staðreyndir eða hvernig reglunum er beitt. Án þess að kanna málið frekar skiluðu kærendur sem keppandi og ritari röngum skorkortum þar sem ekki var gert ráð fyrir því almenna víti sem dómari mótsins hafði gert þeim grein fyrir,“ segir í dóminum.
Með vísan til þessa var úrskurður aganefndar því staðfestur.
Margeir mátti tjá sig á Facebook
Einn angi málsins sem vakið hefur mesta athygli og ókyrrð innan golfhreyfingarinnar eru skrif Margeirs á Facebook í kjölfar þess að honum var vísað úr mótinu. Þar fór hann yfir málið í löngu máli og dró ekki dul á óánægju sína.
Í dóminum segir þó að skrif Margeirs hafi rúmast innan þess ramma sem tjáningarfrelsið gefur.
Þá segir að ekkert hafi komið fram í málinu sem bendir til þess að Kristján Ólafur hafi með nokkrum hætti sýnt af sér óprúðmannlega framkomu á mótinu og að dómarinn finni að því að ekki hafi verið nægjanleg formfesta í störfum mótstjórnar þegar ákvarðanir voru teknar, sem varða mikilvæga hagsmuni einstaklinga.
