Fimmtíu bestu: Svifbergur

Við Íslendingar erum ekkert sérstaklega duglegir að finna góð gælunöfn á íþróttafólkið okkar. En það gerist stundum. Og eitt besta dæmið um það er Sigurbergur Sveinsson, eða Svifbergur eins og hann er oft kallaður.

Hann bar það nafn með rentu enda hefur leikmaður með annan eins stökkkraft varla sést í deildinni hér heima. Sigurbergur hefði sómað sér vel í NBA-deildinni með „hengitímann“ sinn. 

Fjarðarkaupserfinginn hljóp af sér hornin á árunum 2005-07 þegar Haukar unnu engan titil. En hann mætti heldur betur tilbúinn í slaginn þegar Aron Kristjánsson tók við Haukum eftir tímabilið 2006-07 sem var óvenju slakt á Ásvöllum. Sigurbergur var beittasta sóknarvopn Hauka og varð betri og betri með hverjum leiknum.

Haukar urðu Íslandsmeistarar 2008, Íslands- og deildarmeistarar 2009 og Íslands-, bikar- og deildarmeistarar 2010, allt með Sigurberg sem sinn besta sóknarmann.. 

Sigurbergur sneri aftur heim í Hauka 2012. Tímabilið 2012-13 urðu Hafnfirðingar deildarmeistarar en töpuðu í úrslitum fyrir Frömmurum. Haukar urðu aftur deildarmeistarar 2013-14 og komust aftur í úrslit um Íslandsmeistaratitilinn, gegn ÍBV. Það var magnað einvígi sem lauk með epískum oddaleik.

Flestir muna eflaust eftir frammistöðu Agnars Smára Jónssonar og hvernig hann tryggði Eyjamönnum sinn fyrsta Íslandsmeistaratitil. Það skyggði skiljanlega á frammistöðu Sigurbergs sem var samt mergjaður í oddaleiknum (skoraði tólf mörk) og úrslitakeppninni allri. Þar skoraði hann 66 mörk í tíu leikjum og var markahæstur.

Eftir tvö ár í atvinnumennsku tók nýr kafli á ferli Sigurbergs við þegar hann kom heim 2016. Þá gekk hann í raðir ÍBV. Enginn titill vannst á fyrsta tímabili hans í Eyjum en tímabilið 2017-18 vann ÍBV þrefalt. Sigurbergur vann því þrennuna í annað sinn og þær eru stærstu vörðurnar á ferli hans ásamt frammistöðunni í úrslitakeppninni 2014.

Sigurbergur spilaði eitt heilt tímabil í viðbót og átti svo stutta endurkomu 2019-20. Hann spilaði meðal annars í bikarúrslitaleiknum gegn Stjörnunni og hjálpaði ÍBV að vinna bikarinn. 

Það var viðeigandi endir á frábærum ferli eins besta leikmanns sem hefur spilað í deildinni hér heima. Sem sóknarmaður átti hann sér fáa líka. Hann nýtti einstaka líkamlega hæfileika til hins ítrasta og ofan á það bættist afburða leikskilningur.

Sigurbergur er án vafa ein besta skytta sem leikið hefur í íslensku deildinni. Hafði góða yfirsýn og hreint ótrúlegan stökkkraft sem honum var gefinn í vöggugjöf. Hefði þurft að leggja meiri áherslu á vörnina, sérstaklega í byrjun ferilsins. Hefði það orðið niðurstaðan hefði hann getað komist á blað bestu handboltamanna Íslands.

Gaupi

Sigurbergur vann allt galleríið og það oftar en einu sinni. Hann varð fjórum sinnum Íslandsmeistari, fjórum sinnum bikarmeistari og fimm sinnum deildarmeistari. Hann skoraði 887 mörk í deildinni og 276 mörk í úrslitakeppninni og er markahæsti leikmaður hennar á því tímabili sem hér er undir. Bara, vá!