Handbolti

Fimmtíu bestu: Síðasta púslið, markamaskína úr Breiðholtinu og Robert Horry handboltans

Ingvi Þór Sæmundsson skrifar
Leikmennirnir sem enduðu í 30.-26. sæti í valinu á þeim bestu í efstu deild karla í handbolta á þessari öld.
Leikmennirnir sem enduðu í 30.-26. sæti í valinu á þeim bestu í efstu deild karla í handbolta á þessari öld. grafík/hjalti

Hér er farið yfir þá leikmenn sem enduðu í 30.-26. sæti í valinu á bestu leikmönnum í efstu deild karla í handbolta á þessari öld.

30. Arnór Atlason

  • Lið: KA (2000-04)
  • Staða: Vinstri skytta
  • Fæðingarár: 1984
  • Íslandsmeistari: 2002
  • Bikarmeistari: 2004
  • Deildarmeistari: 2001
  • Silfur: 2001
  • Besti leikmaður: 2004
  • Markakóngur: 2004
  • Leikir í deild: 80
  • Mörk í deild: 469
  • Leikir í úrslitakeppni: 20
  • Mörk í úrslitakeppni: 80

Eins og með marga af silfur- og bronsdrengjunum er ekki margt ósagt um feril Arnórs Atlasonar. Nema kannski að rifja upp hvernig hann gjörsigraði efstu deild áður en hann fór til Magdeburg 2004.

Tímabilið 2003-04 var Arnór langbesti leikmaður deildarinnar. Hann var til að mynda markakóngur hennar með 237 mörk í 25 leikjum, eða 9,48 mörk að meðaltali í leik. Aldrei hefur markakóngur efstu deildar verið með jafn mörg mörk að meðaltali í leik og Arnór 2003-04, allavega í seinni tíð.

Arnór Atlason í bikarúrslitaleik KA og Fram 2004. Hann skoraði þrettán mörk í leiknum.þórir tryggvason

Svo átti Arnór auðvitað eina bestu frammistöðu í bikarúrslitaleik fyrr og síðar. KA og Fram áttust við í bikarúrslitaleiknum 2004 þar sem Arnór skoraði hvorki fleiri né færri en þrettán mörk í öruggum sigri KA-manna, 31-23.

Arnór fór eins langt með KA-liðið og mögulegt var og eftir þetta tímabil voru engin fleiri lönd fyrir hann að nema hér heima. Það þurfti að horfa út í heim og þar lék Arnór næstu fjórtán árin á frábærum ferli.

29. Vignir Svavarsson

  • Lið: Haukar (2000-05, 2019-20)
  • Staða: Línumaður
  • Fæðingarár: 1980
  • Íslandsmeistari: 2001, 2003, 2004, 2005
  • Bikarmeistari: 2001, 2002
  • Deildarmeistari: 2002, 2003, 2004, 2005
  • Besti varnarmaður: 2005
  • Leikir í deild: 136
  • Mörk í deild: 309
  • Leikir í úrslitakeppni: 38
  • Mörk í úrslitakeppni: 100

Það tók Vigni Svavarsson nokkurn tíma að verða aðallínumaður Hauka enda var hinn stórgóði Aliaksandr Shamkuts þar fyrir.

En Vignir var algjör lykilmaður í Haukaliðinu sem vann Íslandsmeistaratitilinn þrisvar sinnum í röð (2003-05). Haukar voru sérstaklega öflugir í úrslitakeppninni 2004 og 2005, töpuðu þar aðeins einum leik og unnu úrslitaeinvígin bæði, 3-0. 

Eftir langa dvöl í atvinnumennsku sneri Vignir Svavarsson heim í Hauka 2019.vísir/bára

Vignir varð betri með hverju ári og síðasta tímabilið hans hér á landi, 2004-05, var hann valinn besti varnarmaður deildarinnar. Eftir það hélt hann út og var atvinnumaður í fjórtán ár.

Vignir lauk ferlinum svo með Haukum covid-tímabilið 2019-20. Eftir það lauk glæsilegum ferli eins leikjahæsta landsliðsmanns Íslands frá upphafi.

28. Aron Rafn Eðvarðsson

  • Lið: Haukar (2008-13), ÍBV (2017-18), Haukar (2021-)
  • Staða: Markvörður
  • Fæðingarár: 1989
  • Íslandsmeistari: 2010, 2018
  • Bikarmeistari: 2010, 2012, 2018
  • Deildarmeistari: 2010, 2012-13, 2018
  • Silfur: 2013
  • Besti markvörður: 2012
  • Leikir í deild: 116
  • Mörk í deild: 6
  • Leikir í úrslitakeppni: 27
  • Mörk í úrslitakeppni: 2

Þrátt fyrir að vera búnir að safna svakalegu liði, fá Sigurberg Sveinsson og Róbert Aron Hostert heim, stóðu Eyjamenn slippir og snauðir eftir tímabilið 2016-17. Tímabilið á eftir unnu þeir hins vegar allt sem hægt var að vinna.

Munurinn á ÍBV-liðinu milli ára var einn maður: Aron Rafn Eðvarðsson. Okei, kannski smá einföldun en hann var síðasta púslið sem vantaði í Eyjamyndina.

Aron Rafn átti eina bestu heimkomu, eða millilendingu, atvinnumanns sem sögur fara af. Hann varði og varði, ÍBV vann og vann og stóð uppi með alla þrjá titlana sem í boði voru. Og Aron Rafn var verðskuldað valinn besti leikmaður úrslitakeppninnar.

Aron Rafn Eðvarðsson í bikarúrslitaleiknum 2018 þar sem ÍBV sigraði Fram.vísir/valli

Þetta eitt og sér hefði átt að skila honum inn á þennan lista en ofan á þetta bætast auðvitað við árin hjá Haukum. Þar var Aron Rafn hluti af öðru þrennuliði, 2010, þó vissulega sem varamarkvörður fyrir Birki Ívar Guðmundsson. Hann var síðan aðalmarkvörður Hauka og var valinn besti markvörður deildarinnar 2012.

Höfuðmeiðsli hafa komið í veg fyrir að Aron Rafn hafi látið að sér kveða eftir aðra heimkomuna en það er vonandi að hann snúi aftur inn á völlinn sem fyrst.

27. Sturla Ásgeirsson

  • Lið: ÍR, Valur
  • Staða: Vinstra horn
  • Fæðingarár: 1980
  • Bikarmeistari: 2011, 2013
  • Silfur: 2003
  • Markakóngur: 2014
  • Leikir í deild: 288
  • Mörk í deild: 1492
  • Leikir í úrslitakeppni: 34
  • Mörk í úrslitakeppni: 138

Leitun er að meiri markamaskínu en Sturlu Ásgeirssyni. Á löngum ferli raðaði hann inn mörkum, aðallega í Olís-deildinni. Alls urðu deildarmörkin hans 1492 í 288 leikjum, eða 5,2 að meðaltali í leik.

Aðeins fjórir leikmenn hafa skorað fleiri mörk í efstu deild á Íslandi en Sturla: Valdimar Grímsson, Bjarki Sigurðsson, Halldór Ingólfsson og Ásbjörn Friðriksson. Hann er því í afar góðum félagsskap á þessum lista.

Sturla Ásgeirsson fagnar einu fjölmargra marka sem hann skoraði á ferlinum.vísir/bára

Sturla lék lengst af ferilsins með ÍR en kom einnig við í Val. Þar vann bikarmeistaratitilinn 2011 en hitti annars á frekar klén ár hjá Val. Sturla sneri svo aftur í ÍR og varð bikarmeistari með liðinu 2013.

Þetta reyndust einu tveir titlarnir sem hann vann á ferlinum. Það væri þó ódýrt að láta það sverta ferilinn og afrekaskrána á einhvern hátt enda er Sturla einn besti vinstri hornamaður sem Ísland hefur alið; nýtti færin sín einkar vel, með góða skottækni og frábær í hraðaupphlaupum.

26. Agnar Smári Jónsson

  • Lið: Valur, ÍBV
  • Staða: Hægri skytta
  • Fæðingarár: 1993
  • Íslandsmeistari: 2014, 2018, 2021, 2022
  • Bikarmeistari: 2015, 2018, 2021, 2022
  • Deildarmeistari: 2018, 2020, 2022
  • Leikir í deild: 214
  • Mörk í deild: 639
  • Leikir í úrslitakeppni: 43
  • Mörk í úrslitakeppni: 154

Maður stóru leikjanna, maðurinn sem grípur augnablikið með báðum höndum og gerir það að sínu, maðurinn sem þú veist að er tilbúinn að taka af skarið á úrslitastundu. Það er Agnar Smári Jónsson; Robert Horry íslenska handboltans.

Flestir væru sáttir með að eiga eitt frægt augnablik þegar kemur að því að vinna titla. En Agnar Smári á þrjú.

Það fyrsta og frægasta var auðvitað markið sem tryggði ÍBV sinn fyrsta Íslandsmeistaratitil. Á troðfullum Ásvöllum 14. maí 2014 kórónaði Agnar Smári stórleik sinn þegar hann tók frákast af eigin skoti og skoraði sigurmark ÍBV í oddaleik gegn Haukum, 29-28. Þetta var hans þrettánda mark í leiknum.

Agnar Smári Jónsson fagnar Íslandsmeistaratitlinum 2018.vísir/andri marinó

Hin tvö augnablikin komu á þrennutímabili ÍBV 2017-18. Agnar Smári var besti leikmaður vallarins í bikarúrslitaleiknum gegn Fram og skoraði tólf mörk úr þrettán skotum. Hann var ekki hættur að kvelja Frammara því í lokaumferð Olís-deildarinnar skoraði hann sigurmark Eyjamanna í Safamýrinni og tryggði þeim þar með deildarmeistaratitilinn. Ekki var allt búið enn því ÍBV gerði frábært tímabil stórkostlegt með því að verða Íslandsmeistari í annað sinn.

Síðan Agnar Smári sneri aftur til Vals hefur liðið rakað inn titlum þótt hlutverk hans hafi minnkað mikið. En hann er ás sem er alltaf gott að hafa uppi í erminni.

Agnar Smári hefur haft gríðarlega mikil áhrif á íslenskan handbolta síðasta áratuginn eða svo. Liðin hans vinna og þegar hann var uppi á sitt besta var enginn sem þú vildir frekar að væri með boltann í höndunum og léti vaða í lokasókninni.


Tengdar fréttir




Fleiri fréttir

Sjá meira


×