Handbolti

Fimmtíu bestu á öldinni: Fylgt úr hlaði

Ingvi Þór Sæmundsson skrifar
Næstu þrjár vikurnar verður fjallað um fimmtíu bestu leikmenn efstu deildar karla í handbolta á 21. öldinni.
Næstu þrjár vikurnar verður fjallað um fimmtíu bestu leikmenn efstu deildar karla í handbolta á 21. öldinni. grafík/hjalti

Vísir réðst í það viðamikla verkefni að setja saman lista yfir fimmtíu bestu leikmenn efstu deildar karla í handbolta á þessari öld. Hann birtist á næstu dögum.

En hvernig í ósköpunum velur maður fimmtíu bestu af þeim hundruðum leikmanna sem hafa spilað í efstu deild á Íslandi á þessari öld? Hvaða þættir eiga að vega þyngst? Áþreifanlegir þættir eins og titlar, mörk, lengd ferils og svo framvegis? Eða óáþreifanlegir eins og ára, eftirminnileg augnablik, leiðtogahæfni og þar fram eftir götunum? Og hvað í veröldinni felst í því að vera bestur?

Svo það sé sagt strax er þetta ekki umfjöllun um bestu leikmenn sem spilað hafa í efstu deild á Íslandi ef svo má segja. Þá myndu silfur- og bronsdrengirnir auk leikmanna í íslenska landsliðinu í dag fylla drjúgan hluta listans. 

Björgvin Páll Gústavsson og Hvítu riddararnir hafa sett svip sinn á 21. öldina í efstu deild karla í handbolta.vísir/hulda margrét

En fæstir af þeim leikmönnum komast á þennan lista enda áttu þeir sín bestu ár erlendis og spiluðu alltof stutt hér á landi. Þeir uxu einfaldlega snemma upp úr íslensku deildinni og unnu sín mestu afrek utan landsteinanna.

Tilgangurinn með umfjölluninni er miklu frekar að hampa þeim leikmönnum sem áttu, eða hafa átt, sín bestu ár í deildinni hér heima og mörkuðu dýpstu sporin í sögu hennar á þessari öld. Hverjir voru mikilvægustu leikmennirnir, gerðu mest síðustu rúmu tuttugu árin og réðu mestu um það hvert stóru titlarnir fóru?

En aðeins að verklaginu og valinu. Fyrst reyndi undirritaður að velja bestu leikmenn efstu deildar einn síns liðs, eingöngu með óvísindalegum hætti og með því að fara eftir tilfinningu. En það ferðalag var án áfangastaðar.

Selfyssingar hafa gert sig gildandi á undanförnum árum.vísir/vilhelm

Því var ákveðið að setja upp stigakerfi til að styðjast við. Í kringum sjötíu leikmenn fengu stig út frá ákveðnu kerfi. Markmiðið var ekkert endilega að hafa sjötíu en einhvers staðar varð að stoppa. Leikmenn fengu stig fyrir titla sem þeir unnu, einstaklingsverðlaun, ákveðinn markafjölda sem þeir náðu og svo framvegis. 

Allt voru þetta áþreifanlegir eða hlutlægir þættir nema „besti leikmaður í meistaraliði“ sem gaf hæstu einkunnina. Það er samt í flestum tilfellum nokkuð ljóst en í einhverjum umdeilanlegt, þá helst með síðustu þrjú meistaralið Vals og meistaralið Hauka 2008.

Hlutlægnin skilar sér samt bara ákveðið langt því titlafjöldi vinnur með leikmönnum sem spiluðu lengi hér á landi og tekur ekki tillit til þess hversu stóran þátt viðkomandi átti í árangrinum. David May vann miklu fleiri titla en Alan Shearer en er samt ekki betri leikmaður.

„Fleiri medalíur en Shearer,“ segir David May oft. Það er rétt en enginn heldur því í alvöru fram að hann hafi verið betri leikmaður.getty/Shaun Botterill

Þess vegna var ákveðið að leita álits hjá tuttugu sérfræðingum sem völdu sína tíu bestu leikmenn í efstu deild á þessari öld, frá sæti eitt niður í sæti tíu. Reynt var að hafa sérfræðingana á nokkuð breiðu aldursbili enda 23 ár undir í þessu vali. 

Sérfræðingarnir 

  • Arnar Daði Arnarsson
  • Árni Stefán Guðjónsson
  • Benedikt Grétarsson
  • Edda Sif Pálsdóttir
  • Guðjón Guðmundsson
  • Henry Birgir Gunnarsson
  • Ívar Benediktsson
  • Ólafur Sigurgeirsson
  • Óskar Ófeigur Jónsson
  • Ríkharð Óskar Guðnason
  • Sigurlaug Rúnarsdóttir
  • Sindri Sverrisson
  • Stefán Árnason
  • Stefán Árni Pálsson
  • Styrmir Sigurðsson
  • Svava Kristín Gretarsdóttir
  • Theodór Ingi Pálmason
  • Tómas Þór Þórðarson
  • Þorkell Gunnar Sigurbjörnsson
  • Þórður Már Sigfússon

Stiga- og einkunnagjöfin talaði að mestu saman og summan af þeim ætti að gefa nokkuð góða mynd af því hverjir eru bestu leikmenn efstu deildar karla í handbolta á þessari öld. Ef leikmenn voru jafnir að stigum valdi undirritaður á milli.

Þessi listi yfir fimmtíu bestu leikmenn efstu deildar karla í handbolta á þessari öld er ekki algildur og opinber sannleikur. Þetta var fyrst og fremst gert af væntumþykju um íþróttina, til að freista þess að varðveita söguna og vonandi skapa umræðu.

Fyrsti hluti niðurtalningarinnar birtist í dag. Fyrst munu birtast fimm leikmenn í einu, síðan tveir og loks einn.

Og berjast!




Fleiri fréttir

Sjá meira


×