Körfubolti

Skoraði ótrúlega sigurkörfu frá miðju: „Hvað gerðist þarna?“

Ingvi Þór Sæmundsson skrifar
Pablo Bertone skorar körfuna mögnuðu.
Pablo Bertone skorar körfuna mögnuðu. stöð 2 sport

Pablo Bertone skoraði eina sérkennilegustu körfu ársins þegar Íslandsmeistarar Vals sigruðu Tindastól, 78-84, í 11. umferð Subway-deild karla í gær.

Þessi lið mættust í eftirminnilegu einvígi um Íslandsmeistaratitilinn í vor og þau tóku upp þráðinn þar sem frá var horfið þegar þau áttust við á Sauðárkróki í gær.

Hjálmar Stefánsson kom Val þremur stigum yfir, 78-81, þegar hann setti niður tvö vítaskot. Tindastóll fór í sókn en þriggja stiga skot Antonios Woods geigaði. Frank Aron Booker tók frákastið og gaf boltann á Bertone sem var rétt fyrir innan miðju.

Hann kastaði boltanum fram og sendingin var augljóslega ætluð Callum Lawson en boltinn endaði þess í stað ofan í körfunni. Staðan því orðin 78-84 og sigur Vals í höfn.

Klippa: Ótrúleg sigurkarfa Pablos Bertone

Stefán Árni Pálsson, sem lýsti leiknum á Stöð 2 Sport, áttaði sig ekki alveg á hvað hafði gerst fyrr en eftir nokkrar sekúndur.

„Hvað gerðist þarna? Boltinn fór bara ofan í þarna. Ég sá það ekki,“ sagði Stefán Árni forviða.

Körfuna ótrúlegu sem Bertone skoraði má sjá í spilaranum hér fyrir ofan.

Valur er á toppi Subway-deildarinnar með átján stig. Tindastóll er í 6. sætinu með tólf stig.




Fleiri fréttir

Sjá meira


×