Blökastið hringir inn jólin í beinni út­sendingu

Þeir félagar eru í sannkölluðu gjafastuði því þeir ætla að opna um fimmtíu jólagjafir sem áskrifendum þeirra gefst kostur á að vinna. Til þess að eiga möguleika á að vinna þarf að gerast áskrifandi að Blökastinu hér og kostar áskriftin 1.390 kr.

„Við höfum alltaf lagt mikið upp úr því að áskrifendur græði á því að vera í áskrift. Við gáfum þeim til dæmis jólagjöf. Þá fengu allir áskrifendur net og Stöð2+ frítt i tvo mánuði. Núna ætlum við bara að ganga ennþá lengra og gefa fimmtíu jólagjafir til viðbótar,“ segir Steindi í samtali við Vísi.

Flugferðir, pítsaofn og gömul medalía á meðal vinninga

Gjafirnar í kvöld eru afar fjölbreyttar og geta áskrifendur fengið allt frá ullarsokkum upp í flugferðir, hótelgistingu eða pítsaofn.

„Svo er ég reyndar líka aðeins búin að jazza upp á þetta með stöffi sem ég hef fundið í bílskúrnum. Þannig að þarna verða til dæmis notaðir inniskór, Tekinn serían á DVD og gömul bronsmedalía frá Úlla Ljóta síðan ég lenti í 3. sæti á frisbígolf móti. Það verður einhver heppinn áskrifandi sem fær hana,“ segir Steindi.

„Áhorfendur eiga von á mikilli jólastemmingu og sönnum jólaanda. Mér líður eins og það séu ekki alveg allir komnir í jólaskapið. Það eru svo margir í jólastressinu, ennþá að klára að gera og græja. En ég held að þetta verði tilvalin stund til þess að setjast niður og slaka á, fá sér heitt kakó og piparkökur og vonast til þess að nafnið sitt verði lesið upp.“