Innlent

„Við erum að ræða saman og það er jákvætt“

Margrét Helga Erlingsdóttir skrifar
Ragnar Þór Ingólfsson formaður VR segir að samninganefndirnar reyni að hugsa í lausnum en bendir á að tíminn sé á hlaupum.
Ragnar Þór Ingólfsson formaður VR segir að samninganefndirnar reyni að hugsa í lausnum en bendir á að tíminn sé á hlaupum. Vísir/Vilhelm

Formaður VR segir að allir séu reyna að hugsa í lausnum en tíminn sé óneitanlega að hlaupa frá þeim og líklegt að framhaldið ráðist á morgun. Í dag er eiginlegur sáttafundur hjá ríkissáttasemjara ekki á dagskrá hjá VR, LÍV, samfloti iðnaðar- og tæknimönnum með Samtökum atvinnulífsins en þess í stað eru vinnuhópar á þeirra vegum að störfum í dag.

Fundarhöld hjá ríkissáttasemjara stóðu til um áttaleytið í gærkvöldi. Dagurinn í dag verður helgaður störfum vinnuhópa sem byrjuðu strax klukkan níu í morgun. Elísabet S. Ólafsdóttir aðstoðarsáttasemjari hefur sent út fundarboð um nýjan sáttafund hjá ríkissáttasemjara sem er á dagskrá klukkan 10.00 í fyrramálið.

Ragnar Þór Ingólfsson, formaður VR, segir að það sé erfitt á þessari stundu að meta hvernig gekk á sáttafundi í gær.

„En við erum að ræða saman og það er jákvætt“

Það ríki skilningur á þeim fjölþætta vanda sem launafólk glími við um þessar mundir.

„Við erum með leigumarkaðinn og ákveðin leigufélög sem haga sér með skelfilegum hætti og svo erum við með fjölda fólks sem er með óverðtryggð lán á breytilegum vöxtum, þarna hefur greiðslubyrði hjá þessum hópum aukist um tugi þúsunda og jafnvel hundrað þúsund eða meira og við erum augljóslega ekki að ná utan um allan þennan vanda með kjarasamningi sem snýr bara að launaliðnum, það þarf meira að koma til. Það er eitt af því sem við erum að ræða bæði í vinnuhópunum og að reyna að finna lausnir eða leiðir til þess að ná utan um mjög fjölþættan vanda sem við stöndum frammi fyrir.“

Ragnar hefur vakið máls á framgöngu leigufélagsins Ölmu sem boða hækkun á leiguverði sem nemur 75 þúsund krónum. Bjarni Benediktsson fjármálaráðherra gagnrýndi framferði félagsins á þinginu í morgun og sagði óforsvaranlegt að ganga jafn langt gagnvart fólki og gert var í því tilfelli sem Ragnar fjallaði um. 

Honum finnist líklegt að framhaldið ráðist á morgun.

„Mér finnst það líklegt, svona miðað við þann tíma sem við höfum, það þar að kynna svona samning fyrir okkar baklandi og félagsfólki, það þarf að fara með svona samninga í kosningu og það eru fjölþætt önnur mál eins og sérkjarasamningar sem bæði iðnaðarmenn og við erum með inni í okkar samningum sem þarf að ganga frá líka. Þetta er ekki bara einhver launaliður, þetta er stór pakki og eins og ég segi, ég held það hljóti að skýrast á morgun í hvaða fasa við munum fara í í framhaldinu.“

Ragnar segir að ekki sé tímabært að segja opinberlega hvernig gangi í viðræðum.

„En við erum að ræða saman, það er verið að funda um ýmis mál og eina sem ég hef sagt í sjálfu sér í þessu er að ef við ætlum að reyna að landa skammtímasamningi þá er tíminn að hlaupa frá okkur og ef hann hleypur frá okkur þá erum við bara komin í annan fasa sem er að ræða þá langtímasamning.“


Tengdar fréttir

Verði að sjá til hvort vinnu ljúki fyrir jól

Samflot iðnaðar- og tæknimanna og VR fundar fram á kvöld í Karphúsinu. Staðan er á viðkvæmu stigi en ríkissáttasemjari býst ekki við því að fundað verði langt fram eftir í kvöld.

Ætlar ekki niður á fjóra fætur til að ná samningi

Formaður VR segir tímarammann fyrir skammtímasamning vera mjög knappan en klára þurfi slíkan samning á allra næstu dögum. Ef það takist ekki þurfi að ræða langtímasamninga og því kunni að fylgja átök. Þó markmiðið sé að klára samninga fljótt og vel segist formaðurinn ekki ætla að fara niður á fjóra fætur til að ná samningi fyrir jól. 

Kallar eftir neyðarlögum um leigufélög og myndarlegri aðkomu ríkisins

Formaður VR segir að það muni líklega ekki taka lengri tíma en daginn í dag til að meta hvort flötur sé á samningi við Samtök atvinnulífsins. Hann segir gríðarlega mikilvægt að ríkisstjórnin liðki fyrir viðræðum og helst með neyðarlögum um leigufélög. Staða til dæmis leigjenda og fólks með húsnæðislán með breytilegum vöxtum sé alvarlegri en svo að kjarasamningar einir og sér dugi til.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×