Arnar ætlar að taka niður myndirnar af börnunum sínum og setja plakat af meistara Mori­yasu í staðinn

Arnar Gunnlaugsson er sérfræðingur hjá Ríkissjónvarpinu í kringum útsendingarnar frá heimsmeistaramótinu og hann var í myndverinu eftir sigurleik Japans á Spáni í gær.

Japanska liðið kom til baka á móti bæði Þýskalandi og Spáni eftir að hafa verið 1-0 undir í hálfleik. Það kemur því ekkert á óvart að hálfleiksræðan hafi verið til umræðu meðal sérfræðinganna.

Japan vann báða leikina 2-1 á móti þessum tveimur af stærstu knattspyrnuþjóðum heims og unnu fyrir vikið sinn riðil sem tryggir þeim leik á móti Króatíu í sextán liða úrslitunum.

„Þessi mikli meistari Moriyasu þjálfari Japans. Ég ætla að taka niður myndirnar af börnunum mínum og setja plakat af honum í staðinn. Þetta er algjör snillingur greinilega í hálfleiksræðum því þetta er bara eins og tvö ólík lið að mæta til leiks í fyrri og seinni hálfleik,“ sagði Arnar Gunnlaugsson á RÚV eftir leikinn.

„Þjóðverjum leið mjög vel alveg eins og Spánverjum núna leið mjög vel því þeir voru með algjöra yfirburði. Svo breytir þjálfari Japana leikstílnum, miklu meiri ákefð og allt í einu ertu kominn undir í leiknum,“ sagði Heimir Hallgrímsson við sama tilefni.

„Það er oft sem að þjálfari kemur inn í hálfleik og liðin hans er búið að spila vel. Hann segir þetta frábært og höldum þessu áfram. Þú gleymir oft því að í hinum búningsklefanum er einhver að plotta eitthvað gegn því og einhver önnur herkænska í gangi,“ sagði Arnar.

„Þessi Moriyasu er búinn að sanna það svo sannarlega í þessari keppni að hann er mesti plottarinn sem til er til þessa í keppninni,“ sagði Arnar.

Hajime Moriyasu er 54 ára gamall og hefur þjálfað japanska landsliðið frá árinu 2018. Hann lék sjálfur 35 landsleiki frá 1992 til 1996.