Lífið

„Þetta er erfiðasta innivinna sem ég hef unnið“

Ása Ninna Pétursdóttir skrifar
Daníel Ágúst talaði um upplifun sína í dómarasætinu í IDOL keppninni í einlægu viðtali í Bakaríinu. 
Daníel Ágúst talaði um upplifun sína í dómarasætinu í IDOL keppninni í einlægu viðtali í Bakaríinu.  Vísir/Vilhelm

„Ég sagði bara fljótlega já, vegna þess að mig langaði bara að gera þetta. Mér fannst bara vera kominn tími til að gera eitthvað svona, eitthvað sem ég hafði aldrei gert áður. Svo þegar ég frétti hvaða fólk væri með mér í þessu þá var þetta bara engin spurning.“

Snúið að dæma keppendur sem flest geti sungið

Tónlistarmaðurinn Daníel Ágúst er einn fjögurra dómara í IDOL keppninni sem hóf göngu sína á Stöð 2 síðasta föstudag. Í viðtali í Bakaríinu síðasta laugardag talaði hann opinskátt um upplifun sína í dómarasætinu, dagsformið, heppnina og hvort að það sé raunverulega hægt að keppa í list. 

„Það má keppa í list eins og einhverju öðru,“ segir Daníel og útskýrir hversu snúið það sé þó að eiga að dæma flutning keppenda sem geti augljóslega öll sungið.  

Það komu þarna augnablik þar sem að maður sá að manneskjan getur sungið en er einhvern veginn ekki að ná til manns. En svo eru aðrir sem gera það frá fyrsta tóni. 

Viðtalið við Daníel er hægt að nálgast í heild sinni hér fyrir neðan: 

Daníel segir tímasetningu og röðun keppenda í prufunum geti eðlilega haft áhrif á dómana því að fyrirfram sé erfitt að setja sér einhver föst viðmið. 

„Þegar við settumst niður og fyrsti keppandinn kom inn þá var ekki búið að búa til neinn gæðastaðal og við þurftum bara að búa hann til frá fyrstu framkomu.“

Hæfileikar og keppni í heppni

Þetta er því líka spurning um heppni keppendanna hvenær þeir koma inn í prufuna. Eru dómararnir ferskir, þreyttir, langþreyttir? Er einbeitingin á staðnum?

Þetta eigi að sjálfsögðu líka við um keppendurna sjálfa og dagsformið þeirra. Hvort einbeitingin og orkan sé á réttum stað. 

Glæsilegur og ólíkur dómarahópur IDOLSINS. Herra Hnetusmjör, Birgitta Haukdal, Daníel Ágúst og Bríet. Vísir/Vilhelm

„Þetta er keppni í heppni líka,“ segir Daníel og hlær.  

„Hún er erfið, það tekur á,“ segir hann um tilfinninguna að þurfa að segja sitt álit augliti til auglitis við keppendur og leggja dóm sinn á þá eftir hvern flutning. 

Segja sitt álit, vera hreinskilinn og stundum eru þetta kannski ekki alltaf jákvæð viðbrögð við því sem fólk hefur fram að færa. Stundum er maður bara ekki hrifinn og þá verður maður bara að segja það. En það getur verið sárt.

Mikil áskorun en mikil gleði

Daníel segir dómarastarfið vera erfiðustu innivinnu sem hann hafi verið í hingað til. Vísir/Vilhelm

Aðspurður hvort að eitthvað sérstakt sé búið að koma á óvart við sjálft dómarastarfið segir hann: 

„Þetta er erfiðasta innivinna sem ég hef unnið, og ég hef unnið á leikskóla sko, það er bara grín við hliðina á þessu. Maður þarf að vera gjörsamlega á staðnum með fulla einbeitingu, fókus og athygli. Vera hreinskilinn og taka tillit til svo margs. Þetta er alveg marglaga dæmi og mjög mikil áskorun falin í því en mjög skemmtilegt líka.“ 

Þó að dómararnir komi úr ólíkum áttum og séu ólíkir listamenn segir Daníel þau búin að vera nokkuð samstíga um dóma sína hingað til. Stundum geti þó komið upp sú staða að þau reyni að hafa áhrif hvert á annað og berjist fyrir keppendum sem þau hafi sérstaka trú á. 

 Það er það skemmtilega við þetta. Maður hefur þetta augnablik og fer eftir sinni sannfæringu. 

Viðurkennir að vera kominn með uppáhald

Sjálfur horfði hann á fyrsta þáttinn á föstudaginn og segir hann upplifunina hafa komið sér nokkuð á óvart. 

Daníel er leyndardómsfullur þegar hann er spurður hvort að hann eigi sér nú þegar eitthvað uppáhald í keppninni. Vísir/Vilhelm

„Mér fannst þetta skemmtilegt sjónvarp, ég skemmti mér konunglega yfir þessu og það kom mér smá á óvart hvað þetta er fínt sjónvarpsefni, ég var bara spenntur,“ segir Daníel og hlær. 

Aðspurður um hvort að hann eigi sé eitthvað uppáhald í keppninni verður hann leyndardómsfullur og viðurkennir að það séu þarna keppendur sem hann haldi mikið með og hvetur fólk eindregið til að fylgjast með næstu þáttum.


Morgunþátturinn Bakaríið er á dagskrá alla laugardaga frá 9 - 12 á Bylgjunni. Hér fyrir neðan er hægt að hlusta á síðasta þátt í heild sinni. 


 

Idol verður á Stöð 2 á föstudagskvöldum í vetur. Fleiri hundruð söngvarar spreyttu sig í áheyrnaprufunum en að lokum mun einn standa uppi sem sigurvegari. Fyrsti þáttur fór í loftið föstudagskvöldið 25. nóvember. 



Tengdar fréttir

„Hvað á ég að vera að dæma þig?“

„Mér finnst það alveg hræðilegt en í leiðinni alveg geggjað. Að sitja og eiga eitthvað að dæma,“ segir Birgitta Haukdal söngkona, metsöluhöfundur og nú einn af dómurum í Idol þáttunum sem snúa nú aftur á Stöð 2. 

Frumsamið lag í fyrstu prufu í Idol: „Átti erfiða barnæsku“

Fyrsti þátturinn af fimmtu seríunni í raunveruleikaþáttunum Idol hófst á Stöð 2 í gærkvöldi og má segja að fyrsti þátturinn hafi vakið mikla athygli. Í þættinum var fylgst með áheyrnarprufum keppanda en undir lok þáttarins mætti Anya Hrund, 20 ára nemi, sem er alin upp á Fáskrúðsfirði






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.