Pólitískar ákvarðanir ógni öryggi lögreglufólks og réttaröryggi í landinu

Viktor Örn Ásgeirsson skrifar 23. nóvember 2022 19:41

Jóhann Páll Jóhannsson og Kristrún Frostadóttir þingmenn Samfylkingarinnar vöktu athygli á alvarlegri stöðu löggæslu- og fangelsismála á Alþingi Vísir/Vilhelm

Jóhann Páll Jóhannsson þingmaður Samfylkingarinnar og Kristrún Frostadóttir, þingmaður og nýkjörinn formaður Samfylkingarinnar, gagnrýndu dómsmálaráðherra harðlega á Alþingi í dag. Þau segja stöðu löggæslu- og fangelsismála alvarlega og kalla eftir því að stjórnmálamenn taki afgerandi afstöðu með lögreglu.

„Peningar eru ekki til fyrir stunguvestum fangavarða og að öðru óbreyttu fækkar um 50 rými í fangelsiskerfinu af 170 um áramótin á sama tíma og 320 einstaklingar bíða nú eftir að hefja afplánun. Lögreglunni mætir nú 2% aðhaldskrafa, tvöföldun frá fyrra ári. Þetta er pólitísk ákvörðun ríkisstjórnar, síendurtekin yfir áratug [...] Þessar pólitísku ákvarðanir ógna nú öryggi lögreglufólks vegna undirmönnunar og ógna réttaröryggi í landinu,“ sagði Kristrún í ræðu sinni.

Hún segir að nú slái ríkisstjórnin um sig með 65 milljónum króna sem eigi að fara í fjölga nemendum lögreglunámi á háskólastigi. Um leið sé ráðist í aðhald sem kalli á uppsagnir innan lögreglunnar. Það sé enn eitt dæmi um skort á heildarsýn. Engin heildræn stefna sé í aðhaldi eða uppbyggingu sem skili sér einungis í stórkostlegum kostnaði og veikum innviðum.

Stjórnmálamenn þurfi að standa með lögreglunni

Jóhann Páll tók undir og sagði að stjórnmálamenn þyrftu að standa með lögreglunni, rétt eins og öðrum stofnunum samfélagsins. Standa eigi með fangelsunum og réttarvörslukerfinu í heild sinni. Það verði ekki gert með því að fjársvelta lögregluna og fangelsi landsins.

„Hvers konar stríð gegn glæpum er það nú eiginlega þegar afbrotamenn ganga lausir af því að fangelsin geta ekki tekið við þeim vegna vanfjármögnunar? Og hvers konar stríð gegn glæpum er það þegar menntuðum lögreglumönnum fækkar og fækkar og þegar Ísland lendir í botnsæti í samanburði milli landa eftir fjölda lögreglumanna miðað við höfðatölu?“

Hann skaut föstum skotum á Jón Gunnarsson dómsmálaráðherra sem á dögunum boðaði stríð gegn skipulegri glæpastarfsemi.

„Hvers konar stríð gegn glæpum er það nú eiginlega þegar öryggi fangavarða er ekki tryggt og þegar aðbúnaði í fangelsum er stórkostlega ábótavant eins og Fangelsismálastofnun hefur farið yfir, og þegar fangelsiskerfið er of vanbúið til að geta veitt fólki alvöru tækifæri til betrunar? Virðulegi forseti, þessi frasi dómsmálaráðherra um stríð gegn skipulagðri brotastarfsemi er hálfgerður brandari þegar við lítum á staðreyndirnar fyrir framan okkur,“ sagði Jóhann Páll.

Samfylkingin Alþingi Ríkisstjórn Katrínar Jakobsdóttur Lögreglumál Fangelsismál

Tengdar fréttir

„Þeir virðast vera bara með nóg af vopnum“

Lögregla hefur lagt hald á töluvert af vopnum í tengslum við rannsókn á árásinni á skemmtistaðnum Bankastræti Club. Þar á meðal skotvopn. Aðstoðaryfirlögregluþjónn segir átökin undanfarna daga snúast um völd.

23. nóvember 2022 18:47

Héraðssaksóknari rannsakar myndbandslekann

„Þetta mál verður skoðað, það eru alveg hreinar línur,“ segir Ólafur Þór Hauksson héraðssaksóknari. Grunur leikur á að myndböndum af hnífaárásinni á Bankastræti Club á síðustu viku, hafi verið lekið úr gagnagrunni lögreglunnar. Í myndbandinu sést á tölvuskjá í tákn skráningakerfis lögreglunnar, Löke.

23. nóvember 2022 17:17

Sá yngsti í haldi 17 ára og sá elsti 40 ára

Rannsókn lögreglunnar á höfuðborgarsvæðinu á stunguárásinni á Bankastræti club miðar vel og hefur verið í algjörum forgangi hjá embættinu frá því að málið kom upp. Tíu eru í haldi og er sá yngsti 17 ára og sá elsti 40 ára. Lögreglan rannsakar hvernig myndefni af árásinni rataði í fjölmiðla og hvort starfsmaður embættisins hafi átt hlut að máli.

23. nóvember 2022 17:59

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.