Stíga fram og lýsa hnífs­tungu­á­rásinni: „Svo kemur bara hópur af grímu­klæddum mönnum“

Þetta kemur fram í viðtali sem útvarpsmaðurinn og samfélagsmiðlastjarnan Ágúst Beinteinn Árnason, betur þekktur sem Gústi B, tók við tvö af þremur fórnarlömbum árásarinnar. Í viðtalinu, sem heyra má hér að neðan lýsa þeir Lúkas Geir og John Sebastian árásinni, eins og hún horfði við þeim.

Segjast þeir hafa verið staddir á Latino-kvöldi á neðri hæð skemmtistaðarins.

„Svo kemur bara hópur af grímuklæddum mönnum og bara „rush-ar“ á okkur. Við héldum að þetta væru svona fimmtán „max.“ þangað til lögreglan sagði við okkur að svo kemur í ljós að þeir voru 27,“ segir Lúkas Geir.

Segist hafa séð bútinn standa út úr bakinu

Fimm karlmenn á þrítugsaldri voru úrskurðaðir í gæsluvarðhald í Héraðsdómi Reykjavíkur í kvöld grunaðir um aðild að árásinni. Tíu hafa verið handteknir.

Aðspurður hvort að hann hafi verið hræddur þegar árásin átti sér stað sagði Lúkas Geir að hann í fyrstu ekki áttað sig á því að hnífum hafi verið beitt. Hann segist hafa verið stunginn tvisvar.

„Í flestum tilfellum þá veistu ekkert að þú sért stunginn fyrr en þú sérð það sjálfur. Þegar ég stend upp þá sé ég að það er bútur út úr bakinu mínu, bara hangandi út. Þá fattaði ég að ég hafi verið stunginn. Fyrir það vissi ég ekkert að ég hafi verið stunginn. Þá byrjaði „rush-ið“ og adrenalínið,“ segir hann.

John Sebastian hefur svipaða sögu að segja.

„Þeir koma bara niður tröppurnar. Við ætluðum að fara á klósettið, ég þurfti að pissa. Svo sé ég bara helling af gaurum að vera að að hlaupa niður,“ segir John Sebastian.

„Þá byrjum við að bakka. Þá gátum við ekki bakkað meira. Þá byrjum við að slást á móti þannig séð, reyna að verja okkur því að þeir voru svona margir,“ segir hann enn fremur.

Líður eins og konungi

Báðir liggja þeir á spítala en virðast vera á batavegi eftir árásina. Sjálfur segist John Sebastian hafa verið stunginn sjö sinnum, þar af í bakið og í annað lungað. Hann segist sjálfur vera sultuslakur.

„Mér líður bara eins og „king“. Ég er alveg kóngurinn. Það er ekki hver sem er lifir svona af. Sem eru bara sultuslakir,“ segir hann.

Árásin er rannsökuð sem tilraun til manndráps. Fjallað var ítarlega um málið í kvöldfréttum Stöðvar 2 í gær. Horfa má á þá umfjöllun hér að neðan.

Heimildir fréttastofu herma að margir árásarmannanna hafi starfað sem dyraverðir í miðbænum og tengist sama öryggisfyrirtæki. Þetta hefur lögregla þó ekki viljað staðfesta. Lúkas Geir segist sjálfur að hann kannist við flesta í hópnum.

„Ég kannast nú við þá alla sko, bak við grímuna,“ segir hann.

Og Lúkas er alveg með á hreinu hver ástæða árásarinnar hafi verið.

„Ég held að þeir séu bara „jealous“ (e. öfundsjúkir) út af því að við erum með mikla athygli á okkur.“

Hann segist þó vera ósáttur við að lögregla hafi tekið símann af honum vegna rannsóknar málsins.

„Ég vil bara vera liggja hérna uppi á spítala, slakur í símanum. En ég get ekki verið með símann minn því að þeir eru að rannsaka hann fyrir stungu, sem meikar bara núll sens.“

Hlusta má á viðtalið í heild sinni hér að ofan.