Spyr hvort önnur fram­kvæmd sé nokkuð í boði

Lögregla fór víða um Reykjavík í vikunni í leit að 28 hælisleitendum sem vísa átti úr landi með flugvél um morguninn. Þrettán úr hópnum fundust ekki og að lokum voru fimmtán sendir úr landi. 

Á meðal þeirra var Hussein Hussein, fatlaður maður frá Írak, sem hefur dvalið á Íslandi í meira en eitt og hálft ár. Myndband þar sem honum er lyft úr hjólastól sínum til að vera fluttur á brott hefur vakið nokkra hneykslan á samfélagsmiðlum og mikla gagnrýni í garð stjórnvalda.

Alltaf viðkvæm mál að sögn Jóns

Jón var spurður í málið að loknum ríkisstjórnarfundi í dag. Þar ítrekaði hann að brottvísanirnir hafi verið samkvæmt lögum og reglum.

„Þetta eru alltaf mjög viðkvæm mál, þessar brottvísanir og hér verðum við að hafa það í huga að þetta er allt fólk sem að hefur hlotið málsmeðferð á tveimur stjórnsýslustigum. Fyrir margt löngu komnar niðurstöður í því að þeirra umsókn um dvöl hér er hafnað, bæði af Útlendingastofnun og síðan af Kærunefnd útlendingamála,“ sagði Jón en horfa má á viðtal við hann í spilaranum hér að neðan.

Legið hafi fyrir í lengri tíma að þessir einstaklingar hafi þurft að yfirgefa landið. 

Á meðal þess sem gagnrýnt hefur verið er brottvísun tveggja íraskra nemenda Fjölbrautaskólans við Ármúla sem voru hluti þess hóps sem fluttur var úr landi í vikunni. Nemendurnir voru teknir höndum af lögreglu á leið heim úr skólanum. Skólastjóri Fjölbrautarskólans sagði framkomu stjórnvalda við nemendurna skólans svo ómannúðlega að það er engu lagi líkt. 

Aðspurður um þetta tiltekna mál sagðist Jón ekki hafa sett sig inn í einstaka aðgerðir lögreglu. Hann segist þó geta fullyrt að lögregla taki tillit til viðkvæmrar stöðu einstaklingana.

„Þetta er ekki auðvelt hlutverk fyrir lögreglu að þurfa að standa í þessu. En þegar fólk neitar að fara þrátt fyrir niðurstöður að þá auðvitað veit það að það kemur að því að það þurfi að sækja það. Ég minni á það í þessu tilfelli stóð til að flytja 28 manns úr landi en þrettán fundust ekki. Fólk er líka að stunda það að fara í felur og reyna að forðast það að vera flutt í burtu.“

Þú tekur fram að þrettán fundust ekki. Eru þetta aðferðirnar sem á að nota? Að lögregla fari út um borg og bí, leiti fólk uppi og sendi það úr landi með valdi?

„Er eitthvað annað í boði? Við erum að framfylgja lögum og þeim reglum sem um þetta gilda. Lögreglan hefur auðvitað það verkefni að framkvæma þessar brottvísanir ef fólk fer ekki í góðri samvinnu við stofnanir okkar. Þá er auðvitað einu úrræðin að það þarf að leita fólk uppi, finna það og fylgja þá eftir þessari niðurstöðu sem fengin er í þeirra málum.“

Kallaði eftir frekari skýringum

Katrín Jakobsdóttir forsætisráðherra segist hafa kallað eftir frekari skýringum á framkvæmdinni hjá dómsmálaráðherra á ríkistjórnarfundinum í morgun. 

Hún segir lögreglumenn starfa lögum samkvæmt. Lög um útlendinga hafi verið samþykkt árið 2016 á Alþingi í breiðri samstöðu. Framkvæmdin sé þó iðulega gagnrýnd sem þurfi að skoða.