Fékk ís­lenskt nafn og ævin­týra­lega fæðingar­sögu

Hjónin Gaëlle Barbé og Maxim Hosdez ákváðu að skella sér til Íslands um miðjan ágúst síðastliðinn þegar hún var kominn rúma fimm mánuði á leið. Planið var að nýta tímann saman áður en nýr fjölskyldumeðlimur myndi koma í heiminn.

Sá hafði þó önnur plön fyrir foreldra sína, sem náðu ekkert að skoða landið, því sama dag og þau lentu missti Gaëlle vatnið.

„Nóttina 13. til 14. ágúst var ég lögð inn á spítala vegna þess að ég var kominn fimm og hálfan mánuð á leið og missti vatnið. Þannig að við fórum á sjúkrahúsið í Reykjavík 14. ágúst,“ segir Gaëlle.

Læknarnir vildu því halda henni hér - töldu fæðinguna geta borið brátt að og því mátti hún ekki fljúga heim.

Drengurinn kom svo í heiminn á mánu­dag í síðustu viku og for­eldrarnir á­kváðu að gefa honum ís­lenskt milli­nafn. Við litum við hjá Gaëlle og hittum Milo Bjarma á fæðingar­deildinni í dag. Hægt er að sjá inn­slagið í spilaranum hér að neðan.

„Við maðurinn minn vorum búin að velja nafn, Milo, og okkur fannst gott að bæta öðru nafni við því það er hefð í Frakklandi að bera millinafn. Því ákváðum við að gera það að smá minjagrip eftir ævintýrið og velja íslenskt nafn. Það er Bjarmi,“ segir Gaëlle.

Milo Bjarmi Hos­dez. Valið á ís­lenska nafninu var nokkuð erfitt, segir Gaëlle, en þau hjón báðu um lista yfir al­gengustu ís­lensku nöfnin og völdu það sem þeim þótti fal­legast.

Hún vonast til að komast loks heim með sjúkra­flugi í næstu viku en er stað­ráðin í að heim­sækja Ís­land aftur einn daginn.

„Já, okkur finnst við verða að koma aftur og þá gefst líka tækifæri til að fara í ferð með Milo svo hann geti líka séð Ísland. Ég veit líka að þessi ferð átti stað í hjarta mannsins míns en þetta átti að vera síðasta stóra ferðin sem við færum í fyrir komu sonar okkar. Þannig okkur finnst við eiga óklárað frí og viljum koma aftur til Íslands, “segir Gaëlle.