Golf

Stefna á nýjan golf­völl í Múla­þingi

Bjarki Sigurðsson skrifar
Friðrik Bjartur Magnússon, stjórnarmaður Golfklúbbs Fljótsdalshéraðs, segir golfvöllinn í Ekkjufelli ekki uppfylla kröfur klúbbsins.
Friðrik Bjartur Magnússon, stjórnarmaður Golfklúbbs Fljótsdalshéraðs, segir golfvöllinn í Ekkjufelli ekki uppfylla kröfur klúbbsins. Markaðsstofa Austurlands/Aðsend

Golfklúbbur Fljótsdalshéraðs hefur óskað eftir því að byggður verði nýr golfvöllur á Eiðum. Félagið notast við völl við Ekkjufell sem að sögn stjórnarmanns klúbbsins veldur óánægju meðal golfiðkenda á svæðinu. 

Þrír fulltrúar Golfklúbbs Fljótsdalshéraðs kynntu á þriðjudaginn hugmyndir varðandi mögulega framtíðarstaðsetningu golfvallar félagsins í landi Eiða fyrir byggðaráði Múlaþings. Eigendur Eiða hafa áhuga á golfvelli á landinu. 

Búið að meta landið

Í samtali við fréttastofu segir Friðrik Bjartur Magnússon, stjórnarmaður í klúbbnum, klúbbastarfið hafi ekki litið vel út síðustu ár. Rekja megi það að miklu leiti til vallarins við Ekkjufell.

„Það hefur alltaf verið í umræðunni að færa völlinn úr Ekkjufelli. Því það er leiguland og eitthvað í kringum það. Síðan datt þetta upp í hendurnar á okkur með landið á Eiðum fyrir tveimur árum síðan þegar nýir eigendur kaupa svæðið. Þá kemur hugmyndin í samstarfi við þá að byggja mögulega átján holu golfvöll þar,“ segir Friðrik. 

Búið er að meta landið við Eiðar og hefur golfvallahönnuðurinn Edwin Roald teiknað upp hugmyndir að nýjum velli. Að mati Edwins liggur landið vel fyrir golfvöll og að það bjóði upp á mikla möguleika. 

Friðrik segir að byggðaráð hafi tekið vel í hugmynd þeirra og að þeir hafi fengið jákvæðar undirtektir heilt yfir. Hann segist þó ekki bjartsýnn á að nýr völlur rísi bráðlega en er viss um að ef klúbburinn kyndir vel undir þessu þá muni það gerast fyrr en síðar. 

„Það hafa komið upp í gegnum tíðina alls konar hugmyndir og vinna farið af stað. Fyrir nokkrum árum var vinna komin langt með að fá golfvöll á Eyvindará. það var búið að teikna hann upp en það strandaði síðan á því að sveitarfélagið vildi ekki gefa landið sem til stóð að nýta í það því það væri mögulegt byggingaland í framtíðinni. Síðan hafa verið hugmyndir um að hafa völl á Finnsstöðum,“ segir Friðrik. 

Vill ekki bara lasta völlinn

Þrátt fyrir að vilja færa völlinn segir Friðrik að Ekkjufellið hafi í tíðina reynst iðkendum ágætur. 

„Það er margt gott að segja um þennan golfvöll og mikil vinna sem hefur farið í það að útbúa hann og halda honum uppi síðustu árin. Þannig við skulum ekki bara lasta hann,“ segir Friðrik. 

Byggðaráð skaut málinu til sveitarstjóra sem mun meðal annars sjá um aðstoð í samskiptum félagsins við eigendur Ekkjufells. Ef ásættanleg niðurstaða fæst í mál núverandi aðstöðu verður gengið til samninga við eigendur Eiða varðandi landskipti. 




Fleiri fréttir

Sjá meira


×