Innlent

Þórður Snær segir rann­sókn Páleyjar ráðast af hags­munum Sam­herja

Jakob Bjarnar skrifar
Þórður Snær birti málsvörn sína í morgun en þar setur hann fram alvarlegar ásakanir á hendur ýmsum. Hann telur Páley Borgþórsdóttur lögreglustjóra vera að ganga erinda Samherja við rannsókn á meintri byrlun á Páli Steingrímssyni og framganga Bjarna Benediktssonar fjármálaráðherra er að mati Þórðar Snæs óforsvaranleg í réttarríki.
Þórður Snær birti málsvörn sína í morgun en þar setur hann fram alvarlegar ásakanir á hendur ýmsum. Hann telur Páley Borgþórsdóttur lögreglustjóra vera að ganga erinda Samherja við rannsókn á meintri byrlun á Páli Steingrímssyni og framganga Bjarna Benediktssonar fjármálaráðherra er að mati Þórðar Snæs óforsvaranleg í réttarríki. vísir/vilhelm/aðsend

Þórður Snær Júlíusson, ritstjóri Kjarnans, hefur birt aðsenda grein á fréttavef sínum, þar sem hann setur fram alvarlegar ásakanir á hendur Páley Borgþórsdóttur og lögregluembættinu á Norðurlandi eystra.

Þórður Snær segir rannsóknina á máli hvar hann ásamt þremur öðrum blaðamönnum eru sakborningar og snýr að meintri byrlun á Páli Steingrímssyni, skipstjóra Samherja, og stuld á síma hans sem eigi að liggja til grundvallar hinni svokölluðu Skæruliðadeild Samherja, glórulausa. 

Það sýni gögn málsins með óyggjandi hætti. Sem hljóti að leiða til þeirrar ályktunar að rannsóknin sé drifin af annarlegum hagsmunum, þeim að kæla þá blaðamenn sem hafi vogað sér að fjalla um málefni Samherja í krítísku ljósi. Með öðrum orðum að um misbeitingu lögregluembættisins sé að ræða sem þá gangi erinda alþjóðlegs stórfyrirtækis, lögreglunnar í heimabæ þess. Og slíkt sé ekki sæmandi í réttarríki.

„Hér sé ekki verið að rann­saka mál til sektar eða sýknu heldur helgi til­gang­ur­inn með­al­ið. Álagi sé velt á fjöl­miðla­menn og efa­semdum um heil­indi þeirra sáð í sam­fé­lag­ið. Við búumst sem stendur við því að stöðu okkar sem sak­born­ingum verði haldið lif­andi í ein­hvern tíma enn, þrátt fyrir að bók­staf­lega ekk­ert til­efni sé til,“ segir Þórður Snær.

Hafa kært Pál skipstjóra fyrir hótanir

Þórður Snær greinir frá því að hann hafi fengið öll gögn málsins afhent og þar megi sjá að lögreglunni hafi verið mislagðar hendur. Ómögulegt sé annað en túlka það sem svo að kjarni vegverðar hennar sé að beita afli sínu til að takmarka tjáningarfrelsi fjölmiðla. 

„Til þess að ná fram þessu mark­miði sínu er umrætt lög­reglu­emb­ætti að beita ákvæði laga sem er með inn­byggt refsi­leysi gagn­vart blaða­mönn­um.“

Þórður Snær segir að honum hafi verið gefið að sök að dreifa gögnum sem varða friðhelgi einkalífsins, framið stafrænt kynferðisbrot með dreifingu kynlífsmyndbands af hinum meinta brotaþola, en því hafi verið öfugt farið. Í gögnum sem lögregla afhenti honum geti að líta skjáskot úr kynlífsmyndbandi sem hann hafi aldrei nokkru sinni séð, og ekki viljað sjá.

Þá upplýsir Þórður að auk Páls teljist Arna McClure, lögmaður hjá Samherja, brotaþoli í málinu. Og hann greinir frá því að hann og fleiri fjölmiðlamenn hafi kært Pál Steingrímsson fyrir hótun sem barst í tölvu­pósti í júlí 2022. Lög­regl­an á höf­uð­borg­ar­svæð­inu sé með það mál til rannsóknar. 

Auk þess hafi þeir séð sig knúna til að stefna Páli Vilhjálmssyni bloggara fyrir skrif hans um málið sem Þórður telur ærumeiðandi.

Grafalvarleg framganga Bjarna í málinu

Meðal þeirra sem Þórður Snær beinir spjótum sínum að í málsvörn sinni í áðurnefndri grein er Bjarni Benediktsson fjármálaráðherra. Bjarni lagði lykkju á leið sína og skrifaði pistil á Facebook-síðu sína þar sem hann varði aðgerðir lögregluembættisins á Norðurlandi eystra. 

„Færsla Bjarna var for­dæma­laus og grafal­var­leg, enda öllu skyn­sömu fólki ljóst að þar var valda­mik­ill stjórn­mála­maður að skipta sér af lög­reglu­rann­sókn á blaða­mönnum og koma vilja sínum um fram­gang hennar skýrt til skila,“ segir Þórður Snær. 

Þórður Snær telur afskipti Bjarna Benediktssonar, fjármálaráðherra og formanns Sjálfstæðisflokksins, af málinu vítaverð.vísir/vilhelm

Hann vill meina að pistill Bjarna hafi gefið aðgerðum lög­reglu aukið rétt­mæti og stuðn­ings­menn hans hafi notað pistilinn til staðfestingar þess að um eðli­lega rann­sókn að ræða:

„Bjarni, einn þeirra sem kaus með ofan­greindum laga­breyt­ingum sem inni­héldu refsi­leysi blaða­manna, hafði enda sagt það upp­hátt. 

„Eru fjöl­miðla­menn of góðir til að mæta og svara spurn­ingum lög­reglu?““

Greitt aðgengi Páls að lögreglunni fyrir norðan

Þórður Snær ræður það af gögnum málsins að Páll Steingrímsson hafi haft nánast ótakmarkað aðgengi að lögreglu og að kunningsskapur hans við lögreglumenn sé í einhverjum tilfellum fyrir hendi. 

„Sam­kvæmt gögnum máls­ins fékk Páll fjórum sinnum að gefa skýrslu um meint sak­ar­efni. Fyrst 14. maí 2021 þegar hann lagði fram kæru. Svo aftur 20. og 21. maí sama ár. Og loks 22. nóv­em­ber. Reynslu­miklir lög­menn sem ég hef rætt við segja þetta afar óvenju­legt. 

Páll Steingrímsson skipsstjóri mætti fjórum sinnum til að gefa skýrslu til lögreglu vegna málsins. Að sögn Þórðar Snæs tók saga hans breytingum í hvert skipti en lögreglan fylgdi þó samviskusamlega ábendingum hans eftir.

Sér­stak­lega í ljósi þess að í hvert sinn sem Páll gaf skýrslu þá breytt­ist saga hans og í kjöl­farið breytt­ist rann­sókn lög­regl­unnar í sama takti. Það er ekki fyrr en í þriðju skýrslu­töku sem hann kærir ein­stak­ling nákom­inn sér fyrir að hafa eitrað fyrir sér, tekið sím­ann sinn og afhent hann fjöl­miðla­mönn­um,“ segir í varnarskjali Þórðar Snæs. 

Þá vitnar Þórður Snær í gögnin og segir að Páll hafi verið í ítrek­uðum sam­skiptum við Ingu Maríu Warén, lög­reglu­full­trúa við rann­sókn­ar­deild lög­regl­unnar á Norð­ur­landi eystra sem fer með rann­sókn máls­ins, og Eyþór Þor­bergs­son aðstoð­ar­sak­sókn­ara. 

„Taka skal fram að vera má að þau séu ein­hliða og til marks um ýtni Páls og til­ætl­un­ar­sem­i,“ segir Þórður Snær. Þá segir hann að degi áður en Páll lagði fyrst fram kæru, eða 13. maí 2021, hafi hann hringt per­sónu­lega í rann­sókn­ar­lög­reglu­mann­inn Jónas Hall­dór Sig­urðs­son og sagt honum frá grun­semdum sín­um. „Sá hvatti Pál til að fara á lög­reglu­stöð­ina á Akur­eyri og leggja fram kæru. Páll hringdi beint í þennan rann­sókn­ar­lög­reglu­mann, sem bendir til þess að þeir þekk­ist. Sami rann­sókn­ar­lög­reglu­maður var við­stadd­ur, og tók þátt í, skýrslu­töku yfir mér í ágúst 2022.“

Páll Steingrímsson segir Þóru Arnórs hafa stýrt aðgerðum

Umræddur Páll skipsstjóri birti sjálfur í gær pistil á Facebook-síðu sinni þar sem hann sagðist oft hafa mátt bíta í tungu sína vegna rangfærslna um málið sem fram hafa komið en hann hafi ekki getað tjáð sig opinberlega um málið meðan á rannsókn lögreglu stæði. En þegar Þóra Arnórsdóttir ritstjóri Kveiks, ein fjögurra sakborninga úr blaðamannastétt í málinu, flutti ræðu á Edduverðlaunahátíðinni var honum nóg boðið.

Í pistli sínum segist Páll ekki vera í sömu aðstöðu og fjölmiðlamennirnir með að koma sínum sjónarmiðum á framfæri. Hann vildi meðal annars halda eftirfarandi til haga:

„Mér var byrlað til þess eins og komast í símann minn og samskipti þar enda var ég rétt komin í sjúkrabíl þegar byrjað var að ná í einstaka gögn úr símanum. Sú vinna hélt áfram þegar ég fór í öndunarstopp og í framhaldinu setur í öndunarvél og fluttur á gjörgæslu í Reykjavík. En þá var unnt að vinna á hraðvirkari hátt við afritunina enda kunnáttufólkið sem afritaði símann þar, á sama Leiti og gjörgæslan er. Afritaði síminn er enn notaður til að reyna að komast í gögn í mínum fórum. Sá angi málsins er líka i höndum lögreglu,“ segir Páll meðal annars.

Páll heldur því jafnframt fram í pistli sínum að Þóra hafi stýrt þessum aðgerðum og í gögnum málsins megi sjá að hún hafi misnotað yfirburðarstöðu sína gagnvart veikum einstaklingi, kreist út úr honum upplýsingar á launum hjá Ríkisútvarpinu; upplýsingar sem hún svo hafi birt á öðrum fjölmiðlum. „Ekkert birtist á ríkismiðlinum annað en endurómun áróðurs hinna fjölmiðlanna. Áróðurs sem Þóra vissulega skipulagði á bakvið tjöldin.“

Ef hins vegar má marka Þórð Snæ er ekkert í gögnunum sem sýnir að Páli hafi yfirleitt verið byrlað, svo mikið sem. Og ekkert liggi fyrir hvaðan Þórður Snær fékk upplýsingarnar sem hann svo byggði fréttaflutning sinn af Skæruliðadeildinni svokölluðu á enda sé honum með öllu óheimilt að gefa upp heimildarmenn sína lögum samkvæmt. Þannig sé því um einskærar getgátur Páls að ræða og á því sé allur málatilbúnaðurinn reistur.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×