Rekinn vegna auglýsingar: „Ekki hægt að segja að ég sé siðlaus og gráðugur“

Laudrup tók þátt í langri auglýsingu sem finna má á Youtube þar sem fjallað var um staði sem spennandi væri að heimsækja í Dúbaí, meðal annars með tilvísun í það að borgin tæki vel á móti stuðningsmönnum sem ætli á HM í nágrannaríkinu Katar í vetur.

Þetta féll illa í kramið hjá forsvarsmönnum TV2 sem ráku Laudrup úr starfi fótboltaspekings en hann átti meðal annars að tjá sig í kringum komandi leiki Danmerkur við Króatíu og Frakkland í Þjóðadeildinni.

„Það er ekki hægt að segja að ég hafi orðið eitthvað andlit [Dúbaí] en fyrir mér snerist þetta um fótbolta. Það má alveg kalla mig barnalegan og gagnrýna dómgreind mína,“ sagði Laudrup við Jyllands-Posten.

„En það er ekki hægt að segja að ég sé siðlaus og gráðugur, það er yfir strikið,“ sagði Laudrup sem í auglýsingunni rifjaði meðal annars upp frægt mark sitt og fagn gegn Brasilíu á HM 1998, en hann var einnig ein af stjörnum danska landsliðsins sem varð Evrópumeistari árið 1992.

Brian Laudrup segir að hann hefði ekki tekið þátt í auglýsingunni fyrir Dúbaí hefði hann vitað að það stangaðist á við störf hans fyrir TV2. Politiken ákvað einnig að hætta með hlaðvarpsþættina „Brian og boltinn“ eftir aðeins einn þátt, og ljóst að þessum fyrrverandi vinnuveitendum Laudrup hugnaðist ekki að hann auglýsti ferðamannastað í landi þar sem mannréttindi þykja fótum troðin.

„Ég sagði ekki að Dúbaí væri besti staður í heimi til að vera á. Ég var spurður hvort ég vildi tala um fögnuð fótboltans, sem var alveg einstakt,“ sagði Laudrup og ítrekaði að hann hefði tekið þátt í auglýsingunni í góðri trú.