Tónlist

Björk biður um að ís­lenskir sjón­varps­þættir hætti að sýna morð sem dag­legt brauð

Elísabet Hanna skrifar
Björk mætti í viðtal á útvarpsstöðina X977 fyrr í dag þar sem hún ræddi tónlistina, pólitíkina og lífið.
Björk mætti í viðtal á útvarpsstöðina X977 fyrr í dag þar sem hún ræddi tónlistina, pólitíkina og lífið. Getty/Santiago Felipe

Tónlistarkonan Björk Guðmundsdóttir segir íslenskt sjónvarpsefni láta morð virðast daglegt brauð á Íslandi. Hún biður um að þessu sé breytt, þetta endurspegli ekki íslenskan raunveruleika.

Björk mætti í viðtal á útvarpsstöðinni X977 í dag í tilefni útgáfu lagsins Ovule en lagið er af væntanlegri plötu hennar sem ber heitið Fossora og kemur út í lok mánaðarins. 

Færri morð í íslenskt efni

Björk fór um víðan völl í viðtalinu og ræddi meðal annars íslenskan veruleika og hvernig íslenskt sjónvarpsefni endurspegli hann ekki. Íslenskt efni láti ofbeldi og morð virðast eðlilega atburði.

„Ég vil biðja íslenska listamenn sem gera sjónvarpsþætti og bíómyndir að hætta að vera með svona mörg morð. Þetta er ekki grín. Það er ekki okkar raunveruleiki að það séu fimm morð á viku í sjávarþorpi fyrir norðan. Síðan er horft á þetta og síðustu vikur hafa byrjað hnífabardagar niðri í bæ,“ segir hún.

Björk segir málið alvarlegt og rifjar í þessu samhengi upp skotárásina í Sandy Hook grunnskólanum sem átti sér stað fyrir tíu árum, ekki langt frá heimili dóttur hennar.

„Það er ekkert grín að vera með barn í skóla þar sem er svona mikið ofbeldi. Í Bandaríkjunum eru tvö fjöldamorð á dag. Viljum við þann veruleika á Íslandi?“

Bandarísk pólitík innblástur

Síðustu tuttugu ár hefur Björk skipt tímanum sínum á milli Íslands og New York.

„Ég er alveg flutt núna. Seldi húsið í Brooklyn,“ segir Björk um flutningana til Íslands en dóttir hennar Ísadóra hefur meðal annars gengið í skóla í báðum löndum.

Björk segist hafa sótt innblástur í pólitíkina í Bandaríkjunum þegar hún var að semja fyrir nýju plötuna. Fyrir viku síðan gaf hún út fyrsta lagið af plötunni, Atopos.

„Það er samið fyrir kosningarnar. Þegar Trump var sem betur fer ekki endurkjörinn. Ég var mikið að fylgjast með þessu. Er náttúrulega með annað heimili í Bandaríkjunum og dóttir mín hálfbandarísk.“

Það hefði verið hræðilegt ef Trump hefði verið kosinn til fjögurra ára í viðbót því gjáin á milli fólks sé sívaxandi. „Maður sér það í stjórnmálum og sérstaklega í umhverfismálum. Við þurfum að ná saman hvernig við eigum að leysa þetta.“

Segir Fossora vera neðanjarðarplötu 

Líkt og oft áður fer Björk nýjar slóðir við vinnslu á tónlist sinni. Hún segir að það sé einfaldlega svo gaman að prófa eitthvað nýtt. Á Fossora heyrist meðal annars gabba, sem hún lýsir sem hraðri teknó tónlist. 

„Ég kalla þessa tónlist svona Karíus og Baktus fyrir fullorðna. Það gekk gif með gothurum undir brú, manstu eftir því? Það er góð lýsing á gabba, sem er í raun og veru hljóðheimurinn. Þetta er neðanjarðarplata.“ 

Hér má sjá myndbandið við nýja lagið, Ovule:


Tengdar fréttir

„Ovule er mín skilgreining á ást"

Björk hefur sent frá sér nýja smáskífu ovule þar sem hún kannar brothætta eiginleika ástarinnar; væntingar og leit eftir jafnvægi í samböndum til að færa sig í átt að samlyndi og friðsælli framtíð.

Ísadóra Bjarkardóttir í herferð hjá Miu Miu

Ísadóra Bjarkardóttir Barney, einnig kölluð Doa, nítján ára dóttir tónlistarkonunnar Bjarkar Guðmundsdóttur er í nýrri auglýsingaherferð fyrir skartgripalínu frá merkinu Miu Miu. 






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.