Krafta­verka­kötturinn Grána gamla lifði af al­var­lega árás

Kisan Grána varð fyrir alvarlegri árás fyrir rúmri viku þegar hún skrapp í sinn daglega tíu mínútna göngutúr. Henni tókst við illan leik að komast heim, mikið særð og vönkuð. 

„Hún hafði verið illa bitinn. Það er augljóst að þetta er eftir hundskjaft. Það er hola á hausnum á henni og stórt sár undir kjálkanum,“ segir Kolbrún Eva Viktorsdóttir eigandi Gránu.

Blóðsýkingin kom upp eftir að Grána kom  heim af dýraspítala. Kötturinn er átján ára þannig að þetta leit ekkert sérlega vel út.

„Þá var hún orðin þreföld í framan, bara eins og fílakötturinn og ég hringi í Neyðarvaktina og þeir vilja fá hana strax inn,“ segir Kolbrún.

Grána þurfti meiri meðhöndlun og öflugan sýklalyfjakúr. Kolbrún segir bata hennar framar öllum vonum.

„Ef þetta hefði verið níræð kona hún hefði ekki jafnað sig eftir svona,“ segir Kolbrún. 

Kolbrún segir árásir sem þessar ekki einsdæmi í hverfinu og biðlar til hundaeigenda að passa upp á dýrin sín. hún hafi fengið skilboð frá kattaeigenda um svipaða árás. 

„Fjórum dögum áður en þetta gerist lendir kötturinn hennar í nákvæmlega eins,“ segir hún. 

Kolbrún vonar að Grána eigi nokkur góð ár eftir enda dásamlegur köttur.

„Hún er eiginlega eins og hundur, eltir mig út um allt. Þegar ég fer í vinnunna þá eltir hún mig og vill koma upp í bíl með mér. Ef hún fær það ekki þá bíður hún eftir mér á planinu eða á húddum annarra bíla þangað til ég kem heim. Þessi kisa hefur fylgt mér stóran hluta lífs míns og ég lít nánast á hana eins og mitt eigið afkvæmi. Fyrst áttu mamma og pabbi hana en ég fékk hana svo til mín. Ég er að vona að hún verði að minnsta kosti 25 ára, ég mun gera mitt til að svo verði enda er ég sjúkraliði,“ segir Kolbrún og hlær. 

Tók að sér fimm munaðarlausa kettlinga

Þetta er ekki í fyrsta skipti sem Grána vekur athygli en fyrir tólf árum komst hún í fréttir Stöðvar 2 þegar hún tók að sér fimm munaðarlausa kettlinga sem fundust í bílhræi ásamt því að hafa sína þrjá á spena.  Kettlingarnir komust á legg og er einn þeirra í eigu Margrétar Sifjar Sigurðardóttur mágkonu Kolbrúnar. 

Margrét segist strax hafa gert sér grein fyrir að það kostaði sitt að gera að sárum Gránu og hóf því söfnun fyrir kostnaðinum sem fer fram á Facebook.

„Kostnaðurinn við að geta að sárum Gránu og taka á blóðsýkingunni er á annað hundrað þúsund. Ég hóf því söfnun fyrir þessu á Facebook. Þetta er svo mikil undrakisa að við viljum allt fyrir hana gera. Það sem kemur umfram fer þá í söfnunarsjóð Villikatta þar sem ég er sjálfboðaliði,“ segir Margrét.