Atvinnulíf

Eðlilegt að harmafréttir hafi áhrif á okkur í vinnu

Rakel Sveinsdóttir skrifar
Rannsóknir hafa sýnt að erfiðar fréttir hafa meiri áhrif á okkur en við oft gerum okkur grein fyrir. Líka daglegt líf og vinnu. Það er því eðlilegt að upplifa alls kyns líðan nú þegar hugur okkar er hjá íbúum Húnabyggðar og þeim sem eiga sárast um að binda. 
Rannsóknir hafa sýnt að erfiðar fréttir hafa meiri áhrif á okkur en við oft gerum okkur grein fyrir. Líka daglegt líf og vinnu. Það er því eðlilegt að upplifa alls kyns líðan nú þegar hugur okkar er hjá íbúum Húnabyggðar og þeim sem eiga sárast um að binda.  Vísir

Hugur okkar allra er hjá íbúum Húnabyggðar og þeim sem eiga sárast um að binda. Samhuginn upplifum við víða. Á samfélagsmiðlum. Í fréttum. Í samtölum við vini og vandamenn.

Við erum slegin og margir upplifa sig utan við sig eða að eiga erfitt með að einbeita sér í daglegu lífi og í vinnu.

Þessi líðan er eðlileg og það hafa fjölmargar rannsóknir sýnt. Þess vegna er mikilvægt að sýna okkur sjálfum og öðru fólki samkennd og skilning og gefa okkur svigrúm fyrir þær tilfinningar sem þurfa að koma fram.

Áhrif harmafrétta 

Síðustu árin hafa áhrif frétta á fólk verið rannsökuð af ýmsum aðilum en gott dæmi um hvað sláandi fréttir geta haft mikil áhrif á okkur er rannsókn sem gerð var í Boston í Bandaríkjunum árið 2013.

Þátttakendur í rannsókninni voru fimm þúsund manns sem svöruðu spurningum yfir nokkra vikna tímabil.

Þegar rannsóknartímabilið var um hálfnað var sprengjuódæðið í Boston framið, á frídegi þegar að þúsundir fólks voru að hlaupa Boston maraþonið. Um 130 manns særðust, þar af 30 alvarlega og fljótlega bárust fréttir um að átta ára drengur hefði látist.

Í kjölfarið áttuðu vísindamennirnir sig á því að sem rannsakendur gætu þeir nú séð og metið hvernig áhrif frétta um sprengjuódæðið hefði á fólk.

Fólks sem þó hefði ekki verið á staðnum né þekkti til þeirra sem slösuðust.

Í viðtali við BBC segir einn forsvarsmanna rannsóknarinnar að niðurstöðurnar hefðu verið mjög skýrar:

Áhrif sláandi frétta væru að hafa miklu meiri á okkur en við gerum okkur oft grein fyrir.

Þá sagði hann fólk oftast vanmeta þessi áhrif á okkur. Birtingarmyndirnar væru líka jafn ólíkar og þær eru margar. Allt frá því að hafa áhrif á daglega lífið okkar, vinnuna, viðhorf okkar í einstaka málum og jafnvel líkamlega heilsu síðar meir.

Í umfjöllun Harvard Business Review er sagt frá tveimur rannsóknum sem sýna hversu mikil áhrif sláandi fréttir og erfiðar geta haft á okkur í vinnu.

Í annarri rannsókninni horfðu 110 manns á myndband fyrir klukkan tíu að morgni. Helmingur hópsins horfði á skemmtilegt myndband en hinn helmingurinn horfði á erfitt og sláandi myndband. Niðurstöðurnar voru skýrar: Mun fleiri í þeim hópi sem horfði á erfiða myndbandið upplifði vinnudaginn ekki góðan í samanburði við fólkið sem sá ekki það myndband.

Í hinni rannsókninni horfði fólk á sláandi fréttir á sjónvarpsskjá snemma að morgni þegar það var í ræktinni. Niðurstöður þeirra rannsóknar sýndu að fréttirnar höfðu bein áhrif á það hvernig fólkinu tókst til í verkefnum vinnunnar þann daginn.

Góðu ráðin: Samkennd og skilningur

Að sýna okkur sjálfum og öðrum samkennd og skilning þessa dagana er því af hinu góða og mikilvægt. Því þegar að við erum öll sem eitt að upplifa erfiðar harmafregnir og sorg, er ekkert nema eðlilegt að okkur líði ekki endilega eins og við eigum helst að venjast.

Fyrir þá sem upplifa daglegt líf og vinnudaga mjög erfiða er mælt með:

  1. Að fylgjast minna með fréttum og takmarka þann tíma sem þú fylgist með. Þetta á einnig við um samfélagsmiðla.
  2. Að breyta áreiti úr umhverfinu. Ef þér finnst til dæmis óþægilegt að heyra of mikið tal vinnufélaga um fréttir fjölmiðla, gæti verið ágætis ráð að hlusta á tónlist og passa þá að stilla frekar á útvarpsstöð sem spilar mikið af tónlist en er með minna af umræðum. Aðrar róandi leiðir gætu einnig verið hugleiðsla eða göngutúr í hádeginu. 
  3. Byrja fréttaskoðun dagsins á að finna þér efni sem þú veist fyrirfram að þér finnst frekar skemmtilegt, jákvætt eða góð afþreying.

Atvinnulífið mælir sérstaklega með fréttum Magnúsar Hlyns á Stöð 2, nýjustu fréttir Magnúsar má sjá HÉR.


Tengdar fréttir

„Það er í lagi að segja ekki alltaf allt gott“

Í stað þess að segjast alltaf segja allt gott og þykjast vera hress, þurfum við mögulega að læra að segja satt og viðurkenna að okkur líður ekkert alltaf vel. Líka í vinnunni.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×