Innlent

Tryggja þurfi nýjan vara­flug­­völl og Reykja­víkur­flug­­völlur komi ekki til greina

Hallgerður Kolbrún E. Jónsdóttir skrifar
Dagur B. Eggertsson segir aldrei hafa verið brýnna að byggja upp nýjan varaflugvöll á Suðvesturhorninu sem geti tekið við millilandaflugi frá Keflavík. Reykjavíkurflugvöllur sé ekki til þess búinn.
Dagur B. Eggertsson segir aldrei hafa verið brýnna að byggja upp nýjan varaflugvöll á Suðvesturhorninu sem geti tekið við millilandaflugi frá Keflavík. Reykjavíkurflugvöllur sé ekki til þess búinn. Vísir/Ragnar Visage

Borgarstjóri segir óraunhæft að Reykjavíkurflugvöllur komi í stað hugmynda um flugvöll í Hvassahrauni. Byggja þurfi upp flugvöll á Suðvesturhorninu sem tekið geti við alþjóðaflugi. Reykjavíkurflugvöllur sé ekki undir það búinn. 

Vísindamenn hafa varað við því að við séum gengin inn í jarðhræringatímabil á Reykjanesskaga sem varað gæti áratugi og jafnvel aldir. Sú staða hefur vakið upp áhyggjur um að hugmyndir um innanlandsflugvöll í Hvassahrauni séu ekki skynsamar.

„Ef að það er úti þurfa menn að horfast annað hvort í augu við það að Reykjavíkurflugvöllur verði hér lengur sem slíkur eða þá að við þurfum að horfa til lengri framtíðar á nýjan, annan alþjóðaflugvöll,“ sagði Sigurður Ingi Jóhannsson innviðaráðherra að loknum ríkisstjórnarfundi í gær. 

Sigurður Ingi Jóhannsson innviðaráðherra.Vísir/Vilhelm

Tryggja þurfi uppbyggingu á varaflugvöllum, taka upp varaflugvallagjald og byggja upp Akureyri og Egilsstaði.

„Á sama tíma að verja flugvöllinn í Reykjavík þangað til annar er kominn hér og síðan hefur verið til skoðunar í Hvassahrauni. Við erum auðvitað búin að vera að undirbúa það í þónokkur ár og eigum þar möguleika að spýta í og jafnvel byggja flugstöð í Reykjavík til að bæta þjónustuna,“ bætti hann við.

Alþjóðaflugið hafi vaxið varaflugvallakerfinu yfir höfuð

Dagur B. Eggertsson borgarstjóri í Reykjavík fagnar aukinni umræðu um varaflugvallamál.

„Það hefur raunar legið fyrir í mörg ár að alþjóðaflugið hefur vaxið varaflugvallakerfinu algjörlega yfir höfuð og var skilgreint sem þjóðaröryggismál 2017. Það þarf að bæta þar úr. Það þarf stóran flugvöll á Suðvesturhorninu til að taka við umferð frá Keflavík ef ekki er hægt að lenda þar af einhverjum ástæðum,“ segir Dagur. 

Byggja þurfi upp varaflugvöll sem geti tekið við allri umferð alþjóðaflugs.

„Eldsumbrotin á Reykjanesi vekja upp spurningar hvort við séum að leggja upp í langt tímabil þar. Það setur þessi varaflugvallamál í skarpara ljós. Ein af þeim sviðsmyndum sem teiknuð er upp er að umferð og raforkuflutningar til Keflavíkur lokist. Þess vegna er enn brýnna en áður að byggja nægilega stóran varaflugvöll á Suðvesturhorninu til að taka við öllu flugi frá Keflavík,“ segir Dagur.

Gríðarlegt högg ef Keflavík myndi lokast

Hann sé sammála Sigurði Inga og Katrínu Jakobsdóttur forsætisráðherra að ótímabært sé að afskrifa Hvassahraun í því samhengi, klára þurfi það áhættumat sem verið sé að gera um það. 

Dagur segir Reykjavíkurflugvöll ekki geta sinnt alþjóðaflugi frá Keflavík.Vísir/Vilhelm

„Mestu skiptir að þessu máli sé ekki ýtt á undan sér vegna þess að við prófuðum það í tvö ár í Covid hvað það þýðir fyrir ísland ef flugsamgöngur raskast, hvaða áhrif það hefur á atvinnulífið, hvaða áhrif það hefur á efnahagslífið,“ segir Dagur. 

„Jafnvel þó það væri eitthvað ástand sem myndi bara vara um nokkurra mánaða skeið að Keflavík myndi lokast, þá er það alveg gríðarlegt högg fyrir okkur sem samfélag. Þannig að við verðum að eiga nægilega stóran varaflugvöll á Suðvesturhorninu til að taka við allri flugumferð frá Keflavík og þeim rekstri sem spáð er í flugumferð þar á næstu árum.“

Ruglandi að blanda Reykjavíkurflugvelli í umræðuna

Reykjavíkurflugvöllur dugi ekki til.

„Reykjavíkurflugvöllur er lítill innanlandsflugvöllur en það er algjörlega óraunhæft og engum sem kemur að flugrekstri dettur í hug að Reykjavíkurflugvöllur geti tekið við millilandafluginu sem nú fer um Keflavík. Til þess er hann allt of lítill og engin aðstaða til að taka við nema brotabroti sem lenda á hverjum degi og raunar hverjum klukkutíma í Keflavík. Það í raun bara ruglar umræðuna um nauðsyn stórs varaflugvallar á Suðvesturhorninu að blanda umræðu um Reykjavíkurflugvöll inn í þá umræðu,“ segir Dagur. 

Legið hafi fyrir árum saman að núverandi varaflugvellir - Reykjavík, Akureyri og Egilsstaðir - séu hvorki nógu stórir né umfangsmiklir til að taka við því millilandaflugi sem eigi sér stað daglega, komi eitthvað upp á þannig að ekki sé hægt að lenda í Keflavík. 

„Það hefur raunar legið við stórslysum þegar slík atvik hafa komið upp. Þess vegna er svo mikilvægt og fagnaðarefni að þessi varaflugvallamál séu komin á dagskrá. En þá þarf að fara skipulega yfir þau faglega og klára að taka ákvörðun um byggingu nýs vallar.“


Tengdar fréttir



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.