Handbolti

Kynning: Íslensku stelpurnar sem hafa slegið í gegn á HM

Ingvi Þór Sæmundsson skrifar
Ísland er einum sigri frá því að spila um verðlaun á HM U-18 ára kvenna í handbolta.
Ísland er einum sigri frá því að spila um verðlaun á HM U-18 ára kvenna í handbolta. hsí

Kvennalandslið Íslands í handbolta skipað leikmönnum átján ára og yngri hefur slegið í gegn á HM í Norður-Makedóníu og er komið í átta liða úrslit mótsins.

Ísland hefur unnið fjóra af fimm leikjum sínum á HM og gert eitt jafntefli. Í fyrradag tryggði Ísland sér sigur í millriðli 1 með 25-22 sigri á heimaliði Norður-Makedóníu. Íslendingar mæta Hollendingum í átta liða úrslitum klukkan 16:15 í dag.

En hvaða leikmenn eru þetta sem skipa íslenska liðið? Vísir fékk Árna Stefán Guðjónsson, sem þjálfar U-18 ára liðið ásamt Ágústi Jóhannssyni, til að segja frá leikmönnum þess.

Alfa Brá Oddsdóttir Hagalín (HK) - 17 ára vinstri skytta

Alfa Brá Oddsdóttir Hagalín er einn fjögurra HK-inga í íslenska hópnum.ihf

„Hún er vinstri skytta í sókn og spilar þrist í vörn. Hún er nautsterk, hrikalega sterk maður gegn manni og hefur bætt sig mikið undanfarið ár. Það er mjög stutt í að hún fái alvöru tækifæri í meistaraflokki, allavega í vörn.“

Brynja Katrín Benediktsdóttir (Valur) - 17 ára línumaður

Brynja Katrín Benediktsdóttir fékk stórt hlutverk í leiknum gegn Norður-Makedóníu.ihf

„Er sóknarlínumaður og ótrúlega lunkin þar. Hún er ekki sú hávaxnasta en nösk við að koma sér í stöður. Frábærlega skemmtileg týpa og góð í hóp.“

Elín Klara Þorkelsdóttir (Haukar) - 17 ára leikstjórnandi

Elín Klara Þorkelsdóttir var valinn besti ungi leikmaður Olís-deildar kvenna á síðasta tímabili.ihf

„Frábær í sókn og mjög góð í vörn. Fljót á fótunum og nautsterk. Er sífellt að bæta sig og þegar skilningurinn í sókninni eykst verður hún yfirburðarmaður í deildinni heima, sem hún er á góðri leið með að verða.“

Elísa Elíasdóttir (ÍBV) - 18 ára línumaður

Eyjakonan Elísa Elíasdóttir er sú eina í íslenska hópnum sem hefur leikið fyrir A-landsliðið.ihf

„Frábær leikmaður sem hefur verið í lykilhlutverki hjá ÍBV. Mjög góð í sókn og bindur vörnina okkar saman. Mikill leiðtogi og karakter.“

Embla Steindórsdóttir (HK) - 16 ára leikstjórnandi

Embla Steindórsdóttir skorar í leiknum gegn Alsír sem Ísland vann með 24 marka mun.ihf

„Spilar á miðjunni á móti Elínu Klöru. Klókur leikmaður. Þegar hún kemur inn á fer ekkert bull í gang. Boltinn gengur vel í gegnum hana og hún er góð maður gegn manni. Hún hjálpar okkur líka mikið í vörn og getur spilað bæði þrist og bakvörð.“

Ethel Gyða Bjarnasen (HK) - 17 ára markvörður

Ethel Gyða Bjarnasen hefur slegið í gegn á HM og verið einn af bestu markvörðum mótsins.ihf

„Hún hefur bætt sig mjög mikið á stuttum tíma. Hún er komin aðeins lengra en markverðir á hennar aldri eru almennt, til dæmis varðandi það að geta horft á myndbönd og vita hvert hún á að fara. Tekur fyrirmælum frábærlega og hefur staðið sig ótrúlega vel. Hún á allt hrós skilið.“

Hildur Lilja Jónsdóttir (KA/Þór) - 18 ára hægri skytta/hornamaður

Hildur Lilja Jónasdóttir er fulltrúi Akureyrar í íslenska hópnum.brynja ingimarsdóttir

„Örvhentur leikmaður sem er skytta að upplagi en leysir hornið líka fyrir okkur. Er ótrúlega klók og maður sér að hún hefur æft með Rut [Jónsdóttur] í svolítinn tíma. Hún er klók að finna línusendingar og spilar boltanum vel frá sér. Hún verður betri og betri þegar líkamlegi þátturinn kemur með og hún styrktist meira.“

Inga Dís Jóhannsdóttir (HK) - 18 ára vinstri skytta

Inga Dís Jóhannsdóttir er íslenska liðinu gríðarlega mikilvæg, bæði í vörn og sókn.ihf

„Einn af okkar lykilmönnum. Mjög hávaxin og spilar vinstri skyttu í sókn og þrist í vörn. Hún spilar hún fyrir framan þegar við förum í ÍBV-vörnina [5-1 vörn]. Hún er mjög klók þar, með langar hendur, dugleg að stela boltanum og pressa andstæðinginn í tóma þvælu.“

Ingunn María Brynjarsdóttir (Fram) - 16 ára markvörður

Ingunn María Brynjarsdóttir fagnar af innlifun.ihf

„Er yngsti leikmaður hópsins, fædd 2006. Hún er flottur markvörður og eins og Ethel komin lengra en markverðir á þessum aldri. Það á mikið eftir að gerast hjá henni á næstu 2-3 árum. Hún var í byrjunarliðinu hjá okkur á síðasta móti en núna er Ethel búin að standa sig frábærlega. Fólk á eftir að sjá mikið af henni á næstu árum.“

Katrín Anna Ásmundsdóttir (Grótta) - 18 ára hægri hornamaður

Katrín Anna Ásmundsdóttir var markahæsti leikmaður Gróttu á síðasta tímabili.ihf

„Hefur verið einn af lykilpóstunum hjá Gróttu í Grill 66 deildinni undanfarin tvö ár. Er flottur hornamaður með góða skottækni, sterk í vörn og fljót að keyra fram í hraðaupphlaup.“

Lilja Ágústsdóttir (Valur) - 18 ára vinstri hornamaður

Lilja Ágústsdóttir er markahæst í íslenska liðinu á HM.ihf

„Er fyrirliði liðsins og spilaði með Lugi í sænsku úrvalsdeildinni hluta af síðasta tímabili. Er frábær að klára færin sín, mikill leiðtogi innan vallar sem utan og klók að stela boltanum. Er frábær leikmaður sem getur líka spilað fyrir utan, sem skytta eða á miðjunni.“

Rakel Oddný Guðmundsdóttir (Haukar) - 18 ára vinstri hornamaður

Rakel Oddný Guðmundsdóttir spilar í vinstra horninu á móti Lilju.brynja ingimarsdóttir

„Er uppalin í ÍBV en skipti yfir í Hauka fyrir nokkrum árum. Var þá skytta en hefur fært sig niður í hornið. Hefur bætt sig ótrúlega mikið á skömmum tíma. Er með mikinn stökkkraft, líkamlega mjög góð, snörp og sterk. Hún er vön að loka augunum og lúðra boltanum en þegar mýktin kemur í skotin í horninu verður hún mjög góð.“

Sara Dröfn Richardsdóttir (ÍBV) - 17 ára hægri hornamaður

Sara Dröfn Richarsdóttir skoraði grimmt fyrir U-lið ÍBV á síðasta tímabili.brynja ingimarsdóttir

„Ekkert ósvipuð Katrínu. Klók og lunkin við að stela boltanum. Mjög fljót fram í hraðaupphlaupin og fínasti „slúttari“. Þessi týpíski örvhenti hornamaður.“

Sonja Lind Sigsteinsdóttir (Haukar) - 18 ára hægri skytta/hornamaður

Sonja Lind Sigsteinsdóttir (til vinstri) lék tvo leiki með Stjörnunni í efstu deild í fótbolta fyrir þremur árum, þá aðeins fimmtán ára.hsí

„Getur spilað bæði sem skytta og hornamaður. Er draumur þjálfarans. Hún gerir allt sem hún er beðin um og leysir allt sem þarf að leysa. Mjög góð í vörn og skemmtileg týpa. Hún er alltaf brosandi og gefur af sér, sama hvort hún spilar mikið eða lítið.“

Thelma Melsted Björgvinsdóttir (Haukar) - 18 ára línumaður

Thelma Melsted Björgvinsdóttir (til vinstri) ásamt Elínu Klöru sem eru úr mjög sterkum 2004-árgangi í Haukum.ihf

„Dóttir drottningarinnar sjálfrar [Hörpu Melsted]. Er mjög svipuð týpa og mamma sín. Er leiðtogi þegar hún er í inn á í vörninni. Ótrúlega fljót fram í hraðaupphlaup og með nef fyrir að koma sér í stöður. Stendur sig alltaf mjög vel í landsliðinu.“

Tinna Sigurrós Traustadóttir (Selfoss) - 18 ára hægri skytta

Tinna Sigurrós Traustadóttir sópaði til sín verðlaunum á lokahófi HSÍ í vor. Hún var valin best, efnilegust og besti sóknarmaður Grill 66 deildarinnar.ihf

„Burðarás í liði Selfoss á síðasta tímabili. Maður sér mikinn mun á henni frá síðasta landsliðsverkefni. Er í frábæru líkamlegu standi og einn af okkar lykilpóstum í vörn og sókn. Er nautsterk í bakverðinum og alvöru skytta sem getur bæði farið maður á mann og lúðrað á markið fyrir utan.“




Fleiri fréttir

Sjá meira


×