Golf

Litríkur sex fugla dagur hjá bæði Bjarna og Svanberg í Eyjum

Óskar Ófeigur Jónsson skrifar
Bjarni Sigþór Sigurðsson úr Golfklúbbnum Keili.
Bjarni Sigþór Sigurðsson úr Golfklúbbnum Keili. GSÍ myndir

Keilismaðurinn Bjarni Sigþór Sigurðsson tók forystuna á Íslandsmótinu í golfi sem hófst í Vestmannaeyjum í dag þegar hann kláraði fyrsta hringinn á tveimur höggum undir pari.

Hringurinn hjá Bjarna Sigþór var mjög litríkur en hann fékk sex fugla, tvo skolla og einn skramba á holunum átján. Bjarni Sigþór kláraði á 68 höggum en par vallarins er 70 högg.

Bjarni var sá fyrsti til að klára á tveimur höggum undir pari en Svanberg Addi Stefánsson, sem er líka úr Keili, kláraði aðeins seinna á einu höggi undir pari eftir að hafa fengið sex fugla og fimm skolla á sínum hring.

Þeir Sigurbjörn Þorgeirsson úr Golfklúbbi Fjallabyggðar og Ragnar Már Garðarsson úr Golfklúbbi Kópavogs og Garðabæjar höfðu báðir komið inn á parinu.

Fleiri kylfingar fara nú að klára fyrsta hring og staðan mun örugglega breytast eitthvað eftir því sem líður á daginn.

Það má fylgjast með stöðu mála með því að smella hér.




Fleiri fréttir

Sjá meira


×