Bryggja í Reykhólahöfn gaf sig og hrundi í sjóinn

„Framkvæmdir stóðu núna yfir. Það er sum sé verið að stækka höfnina, við höfum beðið eftir því í mörg ár. Það er verið efnaskipta í botninum og reka nýtt stálþil niður í höfnina,“ segir Ingibjörg Birna Erlingsdóttir, sveitarstjóri Reykhólahrepps í samtali við Vísi. Mbl.is greindi fyrst frá.

Hún segir sveitastjórn hafa verið meðvituð um að höfnin væri orðin viðkvæm.

„Við höfum verið að kanna hvort hún væri nógu sterk. En í þessum framkvæmdum hefur eitthvað gerst þannig að efni hefur komist á milli og eitthvað gefið sig.“

Hún bætir við að til stóð að gera úrbætur í ágúst sem verði nú flýtt. Bráðabirgðaviðgerð verði gerð á höfninni nú upp úr hádegi. „Þeir hjá Vegagerðinni eru staddir núna í Teigsskógi og þeir koma í hádeginu með vélar og tæki,“ segir Ingibjörg. 

Helstu afleiðingar slyssins séu að Þörungaverksmiðjan á Reykhólum geti ekki landað. 

„Það er bara rosaleg heppni að þetta gerðist í nótt en ekki í dag þegar löndun hefði staðið yfir. Það er mikil lukka að það hafi verið hægt að bregðast svona fljótt við, það er bara núna í hádeginu.“